बैंकले ग्राहकको खातामा २८० डलरको सट्टा ८१ ट्रिलियन डलर जम्मा गरेपछि....

काठमाण्डौ । अमेरिकी मल्टीनेशनल इन्भेष्टमेन्ट बैंक तथा वित्तीय सेवा प्रदायक कम्पनी सिटीग्रुपले झुक्किएर ग्राहकको खातामा २८० डलरको सट्टा ८१ ट्रिलियन डलर जम्मा गरेको घटना सार्वजनिक भएको छ ।  

बैंकलाई उक्त रकम फिर्ता गर्न घण्टौं समय लागेको र यसबाट बैंकको सञ्चालनमा समेत समस्या उत्पन्न भएको रिपोर्टमा जनाइएको छ । यो घटना गत वर्षको अप्रिलको हो ।  

यो घटनामा बैंकका दुईजना कर्मचारी संलग्न थिए र यो घटनाबारे ९० मिनेटपछि मात्रै बैंकले थाहा पाएको फाइनान्सियल पोष्टले जनाएको छ । उक्त घटनाको जानकारी बैंकले १० महिनापछि मात्रै सार्वजनिक गरेको हो । यद्यपी बैंकबाट फण्ड भने ग्राहकको खातामा ट्रान्सफर भने हुन नपाएको बैंकले जनाएको छ । बैंकको ‘डिटेक्टिभ कन्ट्रोलले घटनाको पहिचान तत्कालै गरेको र उक्त इन्ट्रीलाई रिभर्स गरेको बैंकले जनाएको छ ।  

गत वर्ष पनि बैंकमा १ अर्ब डलरबराबरको रकम भुक्किएर खातामा गएका १० वटा घटना घटेका थिए । त्यसअघिको वर्षमा यस्ता घटना १३ वटा घटेका थिए ।  

गत महिना बैंकका सीएफओ मार्क म्यासनले कम्प्लाइन्ससम्बन्धी समस्या समाधानका लागि बैंकले लगानी बढाउने बताएका थिए ।  

गत वर्ष बैंकले यी समस्याहरु समाधान गर्नका लागि आवश्यक कदम नचालेको विषयमा १३६ मिलियन डलरबराबरको जरीवाना तिरेको थियो । यस्तै बैंकले सन् २०२० मा ४०० मिलियन डलर जरीवाना तिरेको थियो ।  

यो बैंकले विगतका केही वर्षदेखि सञ्चालनजन्य त्रुटिहरुको सामना गरिरहेको छ ।