सालपा विकास बैंकको घाटा ७५ प्रतिशत बढ्यो, प्रतिसेयर नेटवर्थ १०० रुपैयाँमुनि

 

काठमाण्डौ । सालपा विकास बैंकको घाटा थप फराकिलो बनेको छ। चालु आर्थिक वर्षको पहिलो त्रैमासमा खुद ब्याज आम्दानी सामान्य बढे पनि अन्य सञ्चालन आम्दानीमा आएको ठूलो गिरावट र बढ्दो खर्चले बैंकको वित्तीय नतिजा कमजोर बनाएको हो।

बैंकले सार्वजनिक गरेको आर्थिक वर्ष २०८३/८४ को पहिलो त्रैमासको अलेखापरीक्षित वित्तीय विवरणअनुसार असोज मसान्तसम्म १ करोड ७४ लाख २७ हजार रुपैयाँ खुद घाटा भएको छ। अघिल्लो आर्थिक वर्षको यही अवधिमा बैंक ९९ लाख ८४ हजार रुपैयाँ घाटामा थियो। यस आधारमा बैंकको घाटा ७४.५५ प्रतिशतले बढेको छ।

अघिल्लो वर्षको पहिलो त्रैमासमा १ करोड १० लाख रुपैयाँ रहेको यस्तो आम्दानी यसपटक ६७.७२ प्रतिशतले घटेर ३५ लाख ५२ हजार रुपैयाँमा सीमित भएको छ। यससँगै कुल सञ्चालन आम्दानी पनि २७.१२ प्रतिशतले घटेर १ करोड ९५ लाख ९३ हजार रुपैयाँमा झरेको छ।

खुद ब्याज आम्दानीमा भने सामान्य सुधार आएको छ। अघिल्लो वर्षको १ करोड ४७ लाख ९१ हजार रुपैयाँबाट यस्तो आम्दानी १.२९ प्रतिशतले बढेर १ करोड ४९ लाख ८२ हजार रुपैयाँ पुगेको छ। कुल ब्याज आम्दानी ५.९६ प्रतिशतले घटे पनि ब्याज खर्च ११.२२ प्रतिशतले घट्दा खुद ब्याज आम्दानी जोगिएको हो। शुल्क तथा कमिसन आम्दानी भने २.६८ प्रतिशतले घटेर १० लाख ५८ हजार रुपैयाँ कायम भएको छ।

कर्जा तथा अन्य सम्भावित नोक्सानीबापतको खर्च भने अघिल्लो वर्षभन्दा घटेको छ। यस्तो खर्च १ करोड ८९ लाख ३६ हजार रुपैयाँबाट १५.२० प्रतिशतले घटेर १ करोड ६० लाख ५७ हजार रुपैयाँ कायम भएको छ। तर यो खर्चपछि बाँकी खुद सञ्चालन आम्दानी ३५ लाख ३५ हजार रुपैयाँमा सीमित हुँदा नियमित खर्च धान्ने क्षमता थप कमजोर बनेको छ।

अघिल्लो आर्थिक वर्षको पहिलो त्रैमासमा ७.६१ प्रतिशत रहेको निष्क्रिय कर्जा अनुपात यसपटक ५.१८ प्रतिशतमा झरेको छ। वार्षिक तुलनामा यो २.४३ प्रतिशत बिन्दुको सुधार हो।

घाटा बढेसँगै वितरणयोग्य नाफा पनि ऋणात्मक छ। नियामकीय समायोजनपछि चालु त्रैमासको वितरणयोग्य नतिजा १ करोड ९३ लाख ९ हजार रुपैयाँले ऋणात्मक रहेको छ। अघिल्लो अवधिबाट सरेर आएको घाटासमेत जोड्दा असोज मसान्तमा कुल वितरणयोग्य रकम २ करोड ९८ लाख ७१ हजार रुपैयाँले ऋणात्मक पुगेको छ।

बैंकको प्रतिसेयर आम्दानी ३.३४ रुपैयाँ ऋणात्मक देखाइएको छ। प्रतिसेयर नेटवर्थ पनि गत असार मसान्तको १०३.५२ रुपैयाँबाट घटेर ९८.८३ रुपैयाँमा झरेको छ। बैंकको चुक्तापुँजी ५२ करोड २३ लाख ८८ हजार रुपैयाँ रहेको छ।

वित्तीय अवस्थाको विवरणअनुसार गत असार मसान्तमा १ अर्ब ५५ करोड ९३ लाख रुपैयाँ रहेको निक्षेप असोज मसान्तमा १ अर्ब ५३ करोड ७६ लाख रुपैयाँमा झरेको छ। ग्राहकलाई दिएको कर्जाको खुद मौज्दात भने सोही अवधिमा १ अर्ब १५ करोड ४६ लाख रुपैयाँबाट बढेर १ अर्ब २३ करोड २५ लाख रुपैयाँ पुगेको छ।

बैंकको पुँजी पर्याप्तता अनुपात अघिल्लो वर्षको पहिलो त्रैमासको ३०.७९ प्रतिशतबाट घटेर २८.३५ प्रतिशत कायम भएको छ। कोषको लागत ५.६२ प्रतिशतबाट घटेर ४.३७ प्रतिशतमा आएको छ भने आधार दर १०.३१ प्रतिशतबाट घटेर ९.८६ प्रतिशत कायम भएको छ। कर्जा–निक्षेप अनुपात ६७.६४ प्रतिशत रहेको छ।