अमेरिकामा टिकटक इन्स्टल भएका आईफोन ५ मिलियन डलरसम्म बिक्रीमा

काठमाण्डौ । अमेरिकामा टिकटक इन्टल भएका आईफोनहरु महङ्गो मूल्यमा बिक्रीमा राखिएका छन् । केही दिनअघि अमेरिकामा छाटो समयका लागि टिकटक बन्द भएसँगै टिकटक डाउनलोड भएका आईफोनहरु अनलाइनमार्फत महङ्गो मूल्यमा बिक्रीमा राख्न थालिएको हो ।  

अमेरिकामा अहिले एप्पलस्टोरमा टिकटक एप उपलब्ध छैन । जसको अर्थ पहिलोपटक टिकटक डाउनलोड गर्न चाहने वा पहिलो डिलिट गरेर फेरि डाउन गर्न चाहनेले गर्न सकिरहेका छैनन् ।  

यहि मौकाको फाइदा उठाउँदै केही आईफोन प्रयोगकर्ताहरुले अनलाइन प्लेटफर्ममार्फत टिकटक डाउनलोड भएका आफ्ना आईफोनहरु बिक्रीमा राखेका छन् । यस्तो फोनको न्यूनतम मूल्य १ हजार डलर बढी राखिएको छ । केहीले त सम्भावित खरिदकर्ताका लागि बेस्ट अफर अप्सन समेत दिईरहेका छन् ।  

एकजना आईफोन प्रयोगकर्ताले आफूसँग भएको टिकटक र क्यापकट भएको आईफोन १५ ४.९ मिलियन डलरसम्म बिक्रीमा राखेको मिडिया रिपोर्टमा जनाइएको छ ।  

अमेरिकामा जनवरी १८ मा टिकटक बन्द भएको थियो । यद्यपी यो प्रतिबन्द लामो समयसम्म भने रहेन । जनवरी १९ मा टिकटक फेरि खुलेको थियो । अमेरिकी राष्ट्रपति डोनाल्ड ट्रम्पले टिकटकलाई अमेरिकी स्वामित्वकर्ता खोज्न ७५ दिनको समयावधि दिएका छन् ।