फोल्डेबल आईफोनको डिटेल्स लिक, कहिलेसम्म होला लञ्च ?

काठमाण्डौ । आईफोन निर्माता कम्पनी एप्पलको फोल्डिङ फोनसँग सम्बन्धित जानकारीहरु पछिल्लो केही वर्षहरुदेखि विभिन्न मिडियामा आईरहेका छन् । तथापी कम्पनीले अहिलेसम्म आफ्नो फोल्डिङ फोन लञ्च गर्न सकेको छैन ।  

उता प्रतिष्पर्धि कम्पनी सामसुङले भने आफ्नो फोल्डिङ सिरीजको कयौं नयाँ मोडल लञ्च गरिसकेको छ । यस्तोमा फेरि एकपटक एप्पलको फोल्डिङ फोनको जानकारी बाहिरिएको छ ।  

रिपार्टका अनुसार फोल्ड गर्न मिल्ने आईफोन आगामी वर्ष अर्थात सन् २०२६ मा लञ्च हुनसक्ने सम्भावना रहेको छ । कम्पनीले यो फोनको नाम आईफोन १८ फोल्ड राख्न सक्ने जनाइएको छ । यो फोन अनफोल्ड हुँदा आईफोन १६ प्रोको स्क्रिनभन्दा निकै ठूलो हुनेछ । कम्पनीले यतिबेला दुईवटा फोल्डिङ फोनमाथि काम गरिरहेको जनाइएको छ ।  

कम्पनीले एउटा फोल्डिङ फोन लञ्च गर्नेछ भने अर्को विकल्प आईप्याड हुनेछ । हालैको रिपोर्टमा यी डिभाइसहरुको स्क्रिनसम्बन्धी जानकारी बाहिरिएका छन् । यसले कम्पनीले वास्तवमै यी फोनहरुमाथि काम गरिरहेको अनुमान लगाउन सकिने जनाइएको छ । डिजिटल च्याट स्टेशनले यस बारे जानकारी दिएको छ ।  

एप्पलको फोल्डिङ आईफोनमा ५.४९ इन्चको डिस्प्ले प्राप्त हुनसक्नेछ । अनफोल्ड हुँदा यसको साइज ७.७४ इन्चको हुनेछ । एप्पलको आईफोन १६ प्रो म्याक्सको डिस्प्ले ६.९ इन्चको रहेको छ ।