भारत जापानलाई उछिन्दै विश्वको चौथो ठूलो अर्थतन्त्र बन्न सफल !

नयाँदिल्ली ।  भारतले ऐतिहासिक उपलब्धि हासिल गर्दै जापानलाई उछिन्दै विश्वको चौथो ठूलो अर्थतन्त्रको रूपमा उभिएको छ। नीति आयोगका प्रमुख कार्यकारी अधिकृत (CEO) बी. भी. आर. सुब्रह्मण्यमले शनिबार आयोगको १०औं गभर्निङ काउन्सिल बैठकपछिको पत्रकार सम्मेलनमा यो जानकारी दिएका हुन्।

सुब्रह्मण्यमका अनुसार, भारतको आर्थिक वृद्धिमा अनुकूल भूराजनीतिक परिस्थिति, सस्तो उत्पादन लागत, र अनुकूल व्यापार वातावरणले महत्वपूर्ण भूमिका खेलेका छन्। "मेक इन इन्डिया" जस्ता पहलहरूले विदेशी लगानीकर्तालाई आकर्षित गर्दै देशको औद्योगिक विकासमा टेवा पुर्‍याएका छन्।

हाल भारतभन्दा अगाडि अमेरिका, चीन, र जर्मनी मात्र रहेका छन्। विश्लेषकहरूका अनुसार, भारतले हालको आर्थिक वृद्धिदर कायम राखेमा केही वर्षभित्रै जर्मनीलाई पनि उछिन्दै विश्वको तेस्रो ठूलो अर्थतन्त्र बन्ने सम्भावना छ।

यसका लागि भारतको बढ्दो उपभोक्ता माग, ठूलो जनसंख्या, र उदाउँदो व्यवसायिक वातावरण मुख्य कारण मानिन्छन्।

यस ऐतिहासिक उपलब्धिले भारतको अन्तर्राष्ट्रिय आर्थिक प्रभावलाई थप मजबुत बनाउने विश्वास गरिएको छ।