माण्डु हाइड्रोपावरको नाफा बढेर १८.३० करोड पुग्यो, ईपीएस र आम्दानी समेत बढ्यो

काठमाण्डौ । माण्डु हाइड्रोपावर लिमिटेडले चालु आवको दोस्रो त्रैमाससम्म १८ करोड ३० लाख रुपैयाँ नाफा कमाएको छ । कम्पनीको यो नाफा गत आवको तुलनामा १२.९६ प्रतिशतले बढी हो ।  

गत आवको दोस्रो त्रैमाससम्म कम्पनीले १६ करोड २० लाख रुपैयाँ नाफा कमाएको थियो । कम्पनीको कुल आम्दानी ३९ करोड ६४ लाख रहेको छ । जुन अघिल्लो आवको दोस्रो त्रैमाससम्म ३५ करोड १३ लाखमा सीमित थियो ।

कम्पनीको वित्त खर्च बढेको छ । अघिल्लो आवमा ८ करोड १४ लाख रहेको कम्पनीको वित्त खर्च बढेर ९ करोड ६० लाख पुगेको छ । यो अवधिमा कम्पनीको कर्मचारी खर्च १ करोड ३५ लाखबाट बढेर १ करोड ६२ लाख, सञ्चालन तथा मर्मत खर्च १ करोड ५० लाखबाट बढेर १ करोड ७४ लाख र प्रशासनिक खर्च ४१ लाख ६० हजारबाट बढेर ५२ लाख ४९ हजार पुगेको छ ।  

कम्पनीको चुक्तापूँजी १ अर्ब ३६ करोड रुपैयाँ रहेकोमा रिटेन्ड अर्निङ र रिजर्भमा ५४ करोड ९७ लाख रुपैयाँ सञ्चित रहेको छ ।

कम्पनीको इपीएस ११.८९ रुपैयाँबाट बढेर १३.४३ रुपैयाँ कायम भएको छ भने प्रतिसेयर नेटवर्थ १५२.८२ रुपैयाँ र पीई रेसियो ३०.०५ गुणा रहेको छ ।