हाइड्रोपावर कम्पनीहरुको वित्तीय अवस्था सुधारिदै, शतप्रतिशतले बढ्यो मुनाफा

काठमाण्डौ । हाइड्रोपावर कम्पनीहरुको नाफामा उल्लेख्य सुधार देखिएको छ । कम्पनीहरुले प्रकाशित गरेको वित्तीय विवरणअनुसार चालु आवको दोस्रो त्रैमाससम्ममा हाइड्रोपावर कम्पनीहरुले समग्रमा ६ अर्ब ९१ करोड ७५ लाख रुपैयाँ नाफा कमाएका छन् ।

यो नाफा गत आवको सोही अवधिसम्मको तुलनामा १०२.५७ प्रतिशत बढी हो । गत आवको दोस्रो त्रैमाससम्म हाइड्रो कम्पनीहरुले समग्रमा ३ अर्ब ४१ करोड ४८ लाख रुपैयाँ नाफा कमाएका थिए ।

नेपाल स्टक एक्सचेञ्ज (नेप्से)मा कुल ९७ हाइड्रो कम्पनी सूचीकृत छन् । जसमध्ये ९३ कम्पनीले वित्तीय विवरण सार्वजनिक गरेका छन् भने ४ कम्पनीको रिपोर्ट आउन अझै बाँकी छ ।

सो अवधिसम्म आइपुग्दा अधिकांश कम्पनीको नाफामा उल्लेख्य सुधार देखिएको छ । दोस्रो त्रैमाससम्म ७६ हाइड्रो कम्पनी नाफामा उक्लिएका छन् भने १७ कम्पनी मात्रै घाटामा देखिएका छन् । गत आवको सोही अवधिसम्म भने २८ कम्पनीले घाटा ब्यहोरेका थिए ।

नाफामा उक्लिएका ७६ हाइड्रो कम्पनीले मात्रै दोस्रो त्रैमाससम्म ८ अर्ब ४१ करोड ८४ लाख रुपैयाँ नाफा कमाएका छन् । घाटा ब्यहोर्ने कम्पनीहरुको घाटा कुल नाफामा कटौती गर्दा समग्र हाइड्रो कम्पनीहरुले दोस्रो त्रैमाससम्म झण्डै ७ अर्ब जति नाफा कमाएका हुन् ।

हाइड्रोपावर कम्पनीहरुले दोस्रो त्रैमाससम्म आइपुग्दा विद्युत बिक्री आम्दानी बढाउनुका साथै इन्स्योरेन्स कम्पनीहरुबाट दाबीको रकम पाएसँगै नाफा वृद्धिमा टेवा पुगेको हो । गत असोज महिनामा आएको बाढीले हाइड्रो कम्पनीहरुको प्रोजेक्टमा ठूलो क्षति पुगेको थियो तर कम्पनीहरुले बीमा कम्पनीमा बीमाको दाबी गरेअनुसार चाँडै भुक्तानी पाएपछि कम्पनीहरुको नाफामा सुधार देखिएको हो ।

सो अवधिसम्म सबैभन्दा बढी नाफा कमाउने कम्पनीमा अप्पर तामाकोशी हाइड्रोपावर रहेको छ । कम्पनीले ९९ करोड ६५ लाख रुपैयाँ नाफा कमाएको छ । गत आवको दोस्रो त्रैमाससम्म भने कम्पनीले ८२ करोड २१ लाख रुपैयाँ घाटा ब्यहोरेको थियो ।

यता कम्पनीको विद्युत बिक्री आम्दानीमा पनि उल्लेख्य सुधार देखिएको छ । कम्पनीले विद्युत बिक्रीबाट ६ अर्ब ७ करोड ६२ लाख रुपैयाँ आम्दानी गरेको छ । यो आम्दानी गत आवको सोही अवधिसम्मको तुलनामा ८१.४४ प्रतिशत बढी हो ।

त्यस्तै, दोस्रो बढी नाफा कमाउने कम्पनीमा साहज उर्जा रहेको छ । कम्पनीले ९० करोड ४८ लाख रुपैयाँ नाफा कमाएको छ । यो नाफा गत आवको तुलनामा २७.४६ प्रतिशत बढी हो । साथै कम्पनीको विद्युत बिक्री आम्दानी समेत ५.५२ प्रतिशतले बढेको छ ।

गत आवको दोस्रो त्रैमाससम्म ठूलो घाटा ब्यहोरेका केही कम्पनीहरुले चालु आवको यस अवधिसम्म राम्रै मुनाफा कमाउन सफल भएका छन् जसकारण हाइड्रो कम्पनीहरुको नाफामा सुधार देखिएको हो ।

सो अवधिसम्म सबैभन्दा धेरै घाटा ब्यहोर्ने कम्पनीमा भने रसुवागढी हाइड्रोपावर रहेको छ । कम्पनीले १ अर्ब ८ करोड १४ लाख रुपैयाँ घाटा ब्यहोरेको छ ।

विद्युत बिक्री आम्दानी २४.९८५  ले बढ्यो

हाइड्रोपावर कम्पनीहरुले चालु आवको दोस्रो त्रैमाससम्म विद्युत बिक्रीमार्फत २८ अर्ब १० करोड ५० लाख रुपैयाँ आम्दानी गरेका छन् । यो आम्दानी गत आवको सोही अवधिसम्मको तुलनामा २४.९८ प्रतिशत बढी हो ।

गत आवको दोस्रो त्रैमाससम्म हाइड्रो कम्पनीहरुले विद्युत बिक्रीमार्फत २२ अर्ब ४८ करोढ ८१ लाख रुपैयाँ आम्दानी गरेका थिए ।

सो अवधिसम्म आइपुग्दा अधिकांश कम्पनीको यस्तो आम्दानीमा उल्लेख्य सुधार देखिएको छ । जसकारण कम्पनीहरुको नाफा वृद्धिमा टेवा पुगेको हो ।

विद्युत बिक्रीमार्फत पनि सबैभन्दा धेरै आम्दानी गर्नेमा अप्पर तामाकोशी नै रहेको छ । कम्पनीले विजुली बेचेरै ६ अर्ब ७ करोड रुपैयाँ आम्दानी गरेको छ । यो आम्दानी गत आवको सोही अवधिसम्मको तुलनामा ८१ प्रतिशत बढी हो ।

त्यस्तै, दोस्रोमा साहज उर्जाले १ अर्ब ७० करोड ४९ लाख रुपैयाँ आम्दानी गरेको छ । कम्पनीको यो आम्दानी गत आवको तुलनामा ५.५२ प्रतिशत बढी हो ।

यसका साथै ग्रीन भेन्चर्स लिमिटेडले १ अर्ब १ करोड, अपि पावर कम्पनीले ९५ करोड ९२ लाख, माउन्टेन इनर्जीले ९१ करोड ४४ लाख र सानिमा मिडिल तमोरले ८८ करोड ९१ लाख रुपैयाँ आम्दानी गरेको छ ।

इपीएस कुनको कति ?

हाइड्रोपावर कम्पनीहरुको नाफामा सुधार देखिएसँगै प्रतिसेयर आम्दानी (इपीएस)मा पनि सुधार देखिएको छ ।

करपछिको नाफालाई कुल सेयर संख्याले भाग गर्दा आउने प्रतिफललाई नै प्रतिसेयर आम्दानी भनिन्छ । यो सूचकले कम्पनीको मुनाफा आर्जनको क्षमता देखाउने हुँदा कम्पनीको आधारभुत पक्षको विश्लेषणको प्रमुख सूचकको रुपमा लिइन्छ ।

अझै धितोपत्र दोस्रो बजारमा लगानी गर्नुअघि त कम्पनीको प्रतिसेयर आम्दानी (ईपीएस) कति छ बुझ्न जरुरी हुन्छ । सबैभन्दा बढी इपीएस साहज उर्जाको रहेको छ । कम्पनीको इपीएस ३९.५७ रुपैयाँ छ ।

त्यस्तै, राधी विद्युत कम्पनीको ३२.४६ रुपैयाँ, अप्पर तामाकोशीको २९.८१ रुपैयाँ, मान्डु हाइड्रोको २६.८५ रुपैयाँ, सिकलेस हाइड्रोको २४.९४ रुपैयाँ, नेपाल हाइड्रो डेभलोपर्सको २१.१५ रुपैयाँ, मकर जितुमाया सुरी हाइड्रोको २१.०६ रुपैयाँ र युनाइटेड इदि मार्दीको २०.९४ रुपैयाँ रहेको छ ।