युनाइटेड अजोड इन्स्योरेन्सद्वारा हकप्रद सेयरबापतको रकम जम्मा गर्न आधारभूत सेयरधनीलाई आग्रह

काठमाण्डौ । युनाइटेड अजोड इन्स्योरेन्सले आधारभूत सेयरधनीहरूलाई आफ्नो हकप्रद सेयरबापतको रकम जम्मा गर्न आग्रह गरेको छ । कम्पनीले एक सूचना जारी गर्दै सूचना प्रकाशित भएको मितिले १५ दिनभित्र हकप्रद सेयरबापतको प्रतिसेयर रु.१०० का दरले हुन आउने रकम जम्मा गर्न आग्रह गरेको हो ।  

हकप्रद वापतको रकम लक्ष्मी सनराइज बैंक मा रहेको कम्पनीको खातामा जम्मा गर्नुपर्नेछ। तोकिएको समयसीमाभित्र रकम नबुझाए कानुनी प्रावधानअनुसार प्रक्रिया अगाडि बढाइने कम्पनीले स्पष्ट पारेको छ।

कम्पनीले हाल कायम चुक्तापुँजी २ अर्ब ३१ करोड रुपैयाँको १० प्रतिशत अर्थात १००ः१० अनुपातमा हकप्रद सेयर जारी गर्न लागेको हो। यसअनुसार प्रतिकित्ता १०० रुपैयाँ अंकित दरका २३ लाख १० हजार कित्ता सेयर निष्कासन हुनेछन्।

कम्पनीले गत माघ २७ गते नेपाल धितोपत्र बोर्ड बाट हकप्रद निष्कासनको स्वीकृति प्राप्त गरिसकेको छ। कम्पनीको हकप्रद निष्कासन तथा बिक्री प्रबन्धकको रुपमा लक्ष्मी सनराइज क्यापिटल लिमिटेड रहेको छ ।