खुद बीमाशुल्क आर्जनसँगै बढ्यो सूर्यज्योति लाइफको नाफा

काठमाण्डौ । सूर्यज्योति लाइफ इन्स्योरन्स कम्पनी लिमिटेडले खुद बीमाशुल्क आर्जन बढेसँगै नाफामा सुधार आएको छ । आज प्रकाशित भएको कम्पनीको वित्तीय विवरणअनुसार कम्पनीले ८ अर्ब ६१ करोड रुपैयाँबराबरको खुद बीमाशुल्क आर्जन गरेको छ । अघिल्लो आवको सोही अवधिसम्म ७ अर्ब ५१ करोड रुपैयाँबराबरको खुद बीमाशुल्क आर्जन गरेको थियो ।

बीमाशुलक आर्जन बढेसँगै कम्पनीको नाफा समेत वृद्धि भएको छ । कम्पनीले समीक्षा अवधिसम्म ३३ करोड ३ लाख रुपैयाँबराबरको खुद नाफा आर्जन गरेको छ । यो रकम अघिल्लो आवमा कम्पनीले आर्जन गरेको २९ करोड ५७ लाखको तुलनामा ११.६७ प्रतिशतले बढी हो ।    

कम्पनीको कुल आम्दानी पनि ११ अर्ब ५९ करोड रुपैयाँ रहेको छ । अघिल्लो आवमा भने कम्पनीको कुल आम्दानी १० अर्ब ४८ करोड रुपैयाँ रहेको थियो । यो अवधिमा कम्पनीको खुद दाबी भुक्तानी समेत बढेको छ । अघिल्लो आवमा ८ अर्ब ३८ करोड रुपैयाँ रहेको कम्पनीको दाबी भुक्तानी ९ अर्ब ३५ करोड रुपैयाँ पुगेको छ ।

कम्पनीको कुल खर्च पनि ९ अर्ब ९१ करोड रुपैयाँबाट बढेर ११ अर्ब २ करोड रुपैयाँ रहेको छ । कम्पनीले यो अवधिमा १ लाख ९१ हजार कुल बीमा पोलिसी जारी गरेको छ ।

यस्तै कम्पनीले जीवन बीमा कोषको आकार बढाएको छ । अघिल्लो आवमा ३ अर्ब ९४ करोड रुपैयाँ रहेको कम्पनीको जीवन बीमा कोषको आकार बढेर ४ अर्ब ८४ करोड रुपैयाँ रहेको छ ।

समीक्षा अवधिसम्म  कम्पनीको प्रतिसेयर आम्दानी ८.७९ रुपैयाँ, पीई रेसियो ५०.६४ गुणा र प्रतिसेयर नेटवर्थ १२५.४९ रुपैयाँ कायम भएको छ ।