सेवाग्राहीमाथि हातपात गरेको आरोपपछि यातायात कार्यालय बाराका निमित्त प्रमुख मन्त्रालय तानिए

काठमाण्डौ । कार्यालयमै सेवाग्राहीमाथि हातपात गरेको आरोप लागेपछि यातायात व्यवस्था कार्यालय, बाराका निमित्त प्रमुख चिन्तन आचार्यको जिम्मेवारी खोसिएको छ ।

सेवाग्राहीमाथि कुटपिट गरेको भिडियो सार्वजनिक भएपछि मधेश प्रदेशको श्रम तथा यातायात मन्त्रालयले आचार्यलाई जिम्मेवारीबाट हटाउँदै मन्त्रालयमा तानेको हो । मन्त्रालयका सूचना अधिकारी सुनिल साहका अनुसार सोमबार मन्त्रीस्तरीय निर्णयबाट आचार्यलाई मन्त्रालय तानिएको हो ।

आचार्य हटाइएपछि उनको स्थानमा बारा यातायात व्यवस्था कार्यालयका अधिकृत रामस्वार्थ महतोलाई जिम्मेवारी दिइएको छ ।

घटनाबारे प्रहरी अनुसन्धान जारी रहेको छ । बारा प्रहरीले धनुषा प्रहरीमार्फत आचार्यलाई कार्यालयमा बोलाएर घटनाबारे बुझ्ने काम गरिरहेको जनाएको छ । प्रहरीका अनुसार उनलाई नियन्त्रणमा नलिइए पनि घटनासम्बन्धी सोधपुछ भइरहेको छ ।

गत फागुनको तेस्रो सातातिर आचार्यले आफ्नै कार्यकक्षमा सेवाग्राहीमाथि हातपात गरेको आरोप लागेको हो । घटनामा कार्यालयका चौकीदारको समेत संलग्नता देखिएको अनुसन्धानमा खुलेको छ ।

घटना हुँदा ट्राफिक प्रहरीका सई भानुभक्त आचार्यसहित दुई प्रहरी कर्मचारी पनि घटनास्थलमै रहेको बताइएको छ । घटनाको भिडियो बाहिरिएपछि मन्त्रालयले आचार्यमाथि प्रशासनिक कारबाही अघि बढाएको हो ।