सुरुङ खुल्नुअघि नै ‘फिटनेस ट्र्याक’ बन्यो नागढुंगा–सिस्नेखोला लिङ्क रोड

 

काठमाण्डौ । केही समयपछि हजारौं सवारीसाधन गुड्ने नागढुंगा–सिस्नेखोला सुरुङ मार्गको लिङ्क रोड अहिले भने स्वास्थ्यप्रेमीहरूको अस्थायी ‘फिटनेस ट्र्याक’ बनेको छ।

सुरुङ मार्ग नियमित सञ्चालनमा नआइसकेकाले सडकमा सवारीसाधनको चाप अत्यन्त न्यून छ। यही अवसरको उपयोग गर्दै बिहान सबेरैदेखि युवादेखि ज्येष्ठ नागरिकसम्म यहाँ दौडिन, छिटो हिँड्न र शारीरिक व्यायाम गर्न पुग्ने गरेका छन्।

कलङ्की–नागढुंगा सडक खण्डलाई सुरुङको प्रवेशद्वारसँग जोड्ने यो लिङ्क रोड फराकिलो, सफा र तुलनात्मक रूपमा शान्त छ। दुवैतर्फ खुला दृश्य, बिहानको चिसो हावा र कम सवारी आवागमनका कारण यो क्षेत्र मर्निङ वाक गर्नेहरूको नयाँ रोजाइ बनेको हो।

बिहानको समयमा सडकमा फरक–फरक दृश्य देखिन्छन्। कोही एक्लै दौडिरहेका हुन्छन्, कोही समूह बनाएर ब्रिस्क वाक गरिरहेका हुन्छन् भने केही सर्वसाधारण सडक किनारमा सामान्य व्यायाम गरिरहेका भेटिन्छन्।

स्थानीयहरूका अनुसार काठमाडौं उपत्यकामा खुला, फराकिलो र सुरक्षित रूपमा हिँडडुल गर्न मिल्ने स्थान घट्दै गइरहेका बेला यो सडकले केही समयका लागि भए पनि सहज विकल्प दिएको छ। त्यसैले स्थानीय मात्र नभई आसपासका अन्य क्षेत्रबाट पनि मानिसहरू मर्निङ वाकका लागि यहाँ पुग्न थालेका छन्।

यो सडकको वास्तविक उद्देश्य भने नागढुंगा–सिस्नेखोला सुरुङ मार्गलाई त्रिभुवन राजपथसँग जोडेर सवारी आवागमन सहज बनाउनु हो। सुरुङ सञ्चालनमा आएपछि काठमाडौं प्रवेश गर्ने र बाहिरिने सवारीसाधन यही सडक हुँदै सुरुङभित्र जानेछन्।

सुरुङ सञ्चालनको अन्तिम तयारी भइरहेकाले अहिले लिङ्क रोडमा नियमित सार्वजनिक यातायात सञ्चालन भएको छैन। तर सुरुङ खुलेपछि यहाँ सवारी चाप उल्लेख्य रूपमा बढ्नेछ र अहिले जस्तो स्वतन्त्र रूपमा हिँडडुल तथा व्यायाम गर्न सम्भव नहुन सक्छ।

त्यसैले धेरैले यस समयलाई ‘सुरुङ सञ्चालनअघिको विशेष अवसर’का रूपमा उपयोग गरिरहेका छन्। केही समयपछि गाडीको लस्कर देखिने यही सडकमा अहिले भने बिहानैदेखि दौडिरहेका र स्वास्थ्यका लागि पसिना बगाइरहेका मानिसहरूको दृश्य देखिन्छ।

नेपालको पहिलो आधुनिक सडक सुरुङका रूपमा निर्माण गरिएको नागढुंगा–सिस्नेखोला सुरुङ मार्ग सञ्चालनमा आएपछि काठमाडौं उपत्यका प्रवेश र बाहिरिने यात्राको समय घट्ने तथा नागढुंगाको जाम कम हुने अपेक्षा गरिएको छ।

तर नियमित सवारी सञ्चालन सुरु नहुँदासम्मका लागि भने यसको लिङ्क रोड स्वास्थ्यप्रेमीहरूको खुला व्यायामस्थल र आकर्षक मर्निङ वाक गन्तव्य बनेको छ।