१८ वर्षको उमरमै विश्वविद्यालयको प्राध्यापक बनेर विश्व किर्तिमान

काठमाण्डौ। अमेरिकी नागरिक नाथन थोमसले १८ वर्ष ३६४ दिनको उमेरमा विश्वविद्यालयका प्राध्यापक बनेर विश्व कीर्तिमान कायम गरेका छन्। उनी विश्वकै सबैभन्दा कान्छा विश्वविद्यालय प्राध्यापक बनेका हुन्। हाल २१ वर्ष पुगेका थोमस अध्ययन, अनुसन्धान र अध्यापनलाई सँगसँगै अघि बढाउँदै कानूनमा विद्यावारिधिको तयारी गरिरहेका छन्।

नाथन थोमसले सन् २०२३ अगस्टमा विश्वविद्यालयमा अध्यापन सुरु गर्दा उनको उमेर १८ वर्ष ३६४ दिन मात्र थियो। यसअघि यो कीर्तिमान स्कटल्यान्डका गणितज्ञ कोलिन म्याकलाउरिनको नाममा थियो, जसले १९ वर्षको उमेरमा प्राध्यापकको उपाधि प्राप्त गरेका थिए।

इन्जिनियर परिवारमा जन्मिएका थोमस बाल्यकालदेखि नै गणित, प्रविधि र विज्ञान–प्रविधि क्षेत्रमा रुचि राख्थे। उनले १० वर्षको उमेरमै मियामी डेड कलेजमा अध्ययन सुरु गरेका थिए भने १४ वर्षको उमेरमा फ्लोरिडा इन्टरनेसनल युनिभर्सिटीमा उच्च शिक्षा अघि बढाएका थिए।

जहाँ उनका उमेरका धेरै विद्यार्थी विद्यालयमै अध्ययनरत थिए, त्यही समयमा थोमसले विद्युतीय इन्जिनियरिङमा स्नातक र स्नातकोत्तर गरी दुईवटा विश्वविद्यालय डिग्री हासिल गरिसकेका थिए। उनले दुवै डिग्री उत्कृष्ट नतिजासहित पूरा गरेका थिए।

विश्व कीर्तिमान कायम गरेपछि पनि उनले अध्ययनलाई निरन्तरता दिए। हाल उनी युनिभर्सिटी अफ मियामीमा कानुन विषयको जुरिस डक्टर उपाधि हासिल गर्ने क्रममा छन्।

भविष्यमा थोमसले बौद्धिक सम्पत्ति कानूनको क्षेत्रमा काम गर्ने लक्ष्य राखेका छन्। इन्जिनियरिङ र प्रविधिको ज्ञानलाई कानूनी क्षेत्रमा प्रयोग गर्ने उनको योजना छ।

‘इन्जिनियरिङले मलाई जटिल समस्यालाई व्यवस्थित तरिकाले समाधान गर्न सिकायो। मैले त्यही सोचलाई कानुन अध्ययनमा पनि प्रयोग गरेको छु,’ थोमसले बताएका छन्।

आफ्ना असाधारण उपलब्धिका बाबजुद अध्यापन नै आफूलाई सबैभन्दा बढी सन्तुष्टि दिने काम भएको उनी बताउँछन्। ‘विद्यार्थीले कुनै विषय बुझेर ‘अहिले बुझेँ’ भन्ने क्षण देख्नु नै मलाई सबैभन्दा मनपर्ने कुरा हो। अध्यापनले मलाई विषयलाई अझ गहिराइमा बुझ्न बाध्य बनाउँछ,’ उनले भने।

विश्व कीर्तिमान बनाएका थोमस अहिले पनि प्राध्यापनसँगै उच्च शिक्षा र अनुसन्धानमा सक्रिय छन्। भविष्यमा प्रविधि, कानून र नवप्रवर्तनको संगममा काम गर्ने उनको लक्ष्य रहेको छ।