जुन बच्चालाई छाडिएको थियो, उसले ६५ वर्षपछि आफ्नो परिवारलाई कसरी खोज्यो ?

काठमाण्डौ । जीवनको ६५ वर्षसम्म एउटा प्रश्नको उत्तर खोज्दै बिताएका डेभिड स्टीवेन्सनले अन्ततः आफ्नो जन्म दिने परिवारको पहिचान गर्न सफल भएका छन्। उनको प्रश्न थियो– ‘म कहाँबाट आएको हुँ ?’

पीटरबरोका बासिन्दा डेभिड जन्मेको केही दिनमै परिवारबाट अलग पारिएका थिए। उनलाई ‘फाउन्डलिङ’ भनिन्छ, अर्थात् जन्म दिने अभिभावकले छाडेपछि अरू व्यक्तिले फेला पारेका बालबालिका।

सन् १९६० मा लन्डनको गोल्डर्स ग्रीनस्थित एक भवनको हलवेमा केही दिनका शिशु डेभिड भेटिएका थिए। उनलाई किन त्यहाँ छाडियो भन्नेबारे कुनै जानकारी थिएन। पछि स्टीवेन्सन परिवारले उनलाई धर्मपुत्रका रूपमा स्वीकार गर्‍यो।

डेभिडका अनुसार उनी हुर्किंदै गर्दा आफू फाउन्डलिङ भएको कुरा उनलाई थाहा थियो। उनका धर्मपुत्र आमाबुबाले पनि उनलाई यसबारे बताएका थिए। तर आफ्नै सन्तान भएपछि भने उनको मनमा आफ्नो जन्म र परिवारबारे थप जिज्ञासा बढ्न थाल्यो।

सन् १९६० मै ‘डेली मेल’ले लन्डनको एक भवनको दोस्रो तलामा छाडिएको ‘रेनबो बेबी’को पहिचान खोज्न अपिल गरेको थियो। सन् २००९ मा पनि उक्त पत्रिकाले नयाँ जानकारी प्राप्त गर्ने उद्देश्यले यो घटना पुनः प्रकाशित गरेको थियो।

तर वर्षौंसम्म खोजी गर्दा पनि डेभिडले आफ्नो जन्म दिने आमाबुबाबारे खासै जानकारी पाउन सकेनन्। उनका अनुसार धर्मपुत्र ग्रहणसम्बन्धी अभिलेखमा पनि निकै सीमित विवरण मात्र थियो।

उनले आफ्नो खोजलाई ‘परालको थुप्रोमा सियो खोजेजस्तै’ कठिन भएको बताएका छन्।

प्रहरी अधिकारीको अभिलेखले खोल्यो पुरानो रहस्य

डेभिडकी पत्नी जुली स्टीवेन्सनले पनि उनको विगतबारे खोजी गर्न चासो देखाइन्। खोजीका क्रममा उनले डेभिड भेटिएको घटनासम्बन्धी पुरानो प्रहरी प्रतिवेदन रहेको पत्ता लगाइन्।

त्यसपछि उनले त्यतिबेला घटनाको जिम्मेवारी सम्हालेकी महिला प्रहरी अधिकारी टेगवेन कर्ललाई खोजिन्। कर्लले डेभिडलाई उद्धार गरेको घटना आफूले कहिल्यै बिर्सन नसकेको बताइन्। उनका लागि त्यो प्रहरी सेवाकै सबैभन्दा सम्झनलायक र भावुक घटनामध्ये एक थियो।

यही अनुसन्धानका क्रममा अन्ततः डेभिडकी जन्मदिने आमाको पहिचान पनि खुल्यो। उनकी आमा पेट्रा सन् १९४० मा नेदरल्यान्ड्समा जन्मिएकी थिइन् र क्याथोलिक परिवारमा हुर्किएकी थिइन्।

जुलीका अनुसार पेट्रा १९ वर्षको उमेरमा ‘अ–पेयर’का रूपमा काम गर्न फ्रान्स हुँदै बेलायत पुगेकी थिइन्। सन् १९६० मा उनले डेभिडलाई जन्म दिएकी थिइन्।

यद्यपि लन्डन पुग्दा उनलाई आफ्नो गर्भावस्थाबारे थाहा थियो वा थिएन भन्ने स्पष्ट नभएको बताइएको छ। तर उनले गर्भावस्थाको पूरा अवधि बच्चालाई राखेकी थिइन् र त्यस क्रममा वरपरका मानिसबाट केही सहयोग पाएको देखिएको जुलीले बताइन्।

डीएनए परीक्षणले परिवारसम्म पुर्‍यायो

डेभिड सन् २०१५ मा फाउन्डलिङ म्युजियमको भ्रमणका क्रममा आईटीभीको ‘लङ लस्ट फ्यामिली’ कार्यक्रमको टोलीसँग सम्पर्कमा आएका थिए।

डीएनए परीक्षण र वंशावलीसम्बन्धी अनुसन्धानमार्फत कार्यक्रमको टोलीले डेभिडकी जन्मदिने आमाको पहिचान गर्न सफल भयो।

तर डेभिडले आफ्नी आमासँग प्रत्यक्ष भेट्ने अवसर भने पाएनन्। उनकी आमाको सन् २०१० मै निधन भइसकेको थियो।

यद्यपि, नयाँ भेटिएका आफन्तहरूले आफ्नी आमाबारे सुनाएका कथामार्फत उनीसँग भावनात्मक रूपमा नजिक भएको डेभिड बताउँछन्।

उनका अनुसार उनकी आमा निकै मायालु महिला थिइन्। डेभिडलाई लाग्छ, आमाले उनको हेरचाहका लागि कुनै व्यवस्था गरेकी हुनुपर्छ। तर कुनै कारणले त्यो योजना सफल नभएपछि आफू सरकारी हेरचाह प्रणालीमा पुगेको हुन सक्ने उनको अनुमान छ।

‘म उनलाई दोष दिन चाहन्नँ’

डेभिडले आफ्नी आमाप्रति कुनै आक्रोश नरहेको बताएका छन्।

उनका अनुसार सन् १९५० र १९६० को दशकमा विवाहबिना आमा बन्नु महिलाका लागि निकै कठिन सामाजिक अवस्था थियो। त्यसैले उनकी आमाले आफ्नो परिस्थितिमा सम्भव भएसम्म राम्रो निर्णय गर्न खोजेको हुन सक्ने उनको बुझाइ छ।

जुलीले पनि पेट्राले किन आफ्नो छोरासामु आउन सकिनन् भन्नेबारे निर्णय गर्ने अधिकार आफूहरूलाई नभएको बताइन्।

उनका अनुसार पेट्रासँग आफ्ना कारणहरू हुन सक्छन् र अरूले उनको जीवन नबाँचेकाले उनको निर्णयमाथि फैसला गर्नु उचित हुँदैन। तर त्यतिबेला भएको घटना भने निकै दुःखद रहेको उनले बताइन्।

नेदरल्यान्ड्समा भेटिए नयाँ आफन्त

आफ्नो जन्म परिवारबारे जानकारी पाएपछि डेभिड नेदरल्यान्ड्सको रोटरड्याममा रहेका आफ्नी आमाकी बहिनी म्यारिएन र अन्य कजिनहरूसँग पुनः जोडिएका छन्।

उनले नयाँ परिवारबाट आफूले अत्यन्तै न्यानो स्वागत पाएको बताएका छन्। उनीहरूलाई भेटेर आफू निकै खुसी भएको उनको भनाइ छ।

डेभिडका अनुसार यो पुनर्मिलन आधुनिक डीएनए प्रविधिका कारण सम्भव भएको हो। क्यानडाकी एक युवतीको डीएनए उनको डीएनएसँग मेल खाएपछि अनुसन्धानकर्ताहरू उनको परिवारसम्म पुग्न सफल भएका थिए।

यस क्रममा डेभिडले आफ्नी परदादी इन्डोनेसियाकी भएको जानकारीसमेत पाएका छन्।

६५ वर्षपछि आफ्नो जन्मको रहस्य खुलेपछि आफू कहाँबाट आएको हुँ भन्ने प्रश्नको उत्तर पाएकोमा डेभिड सन्तुष्ट छन्। तर उनको खोजी अझै पूर्ण भएको छैन। अब उनले आफ्नो बुबातर्फको परिवारको पहिचान गर्ने यात्रा जारी राख्नुपर्नेछ।