पर्यटक आए तर नाफा आएन, नेप्सेका चार होटल १ अर्बभन्दा बढी घाटामा

काठमाण्डौ । नेप्सेमा सूचीकृत होटल कम्पनीहरूको वित्तीय अवस्था कमजोर देखिएको छ ।  

गत आर्थिक वर्ष २०८२–८३ को चौथो त्रैमासिक वित्तीय विवरणअनुसार सूचीकृत पाँच होटलमध्ये चार कम्पनीले घाटा व्यहोरेका छन् भने एउटा कम्पनीले मात्र नाफा कमाउन सफल भएको छ ।  

पर्यटन व्यवसायमा सुधारका संकेत देखिए पनि सञ्चालन खर्च, कर्मचारी खर्च, ब्याज लागत, ऋणको भार तथा अन्य वित्तीय दायित्व बढ्दा होटल कम्पनीहरूको नाफामा दबाब परेको देखिन्छ ।  

पर्यटक आगमन र होटलको अकुपेन्सीमा सुधार भए पनि त्यसको प्रत्यक्ष लाभ कम्पनीहरूको नाफामा पर्याप्त रूपमा देखिन सकेको छैन । उच्च सञ्चालन लागतका कारण आम्दानी बढ्दा पनि खर्च व्यवस्थापन गर्न नसक्दा अधिकांश होटलहरु घाटामा पुगेका हुन् ।

गत आवको वित्तीय तथ्याङ्कअनुसार सोल्टी होटल बाहेक सबैले ठूलो नोक्सानी बेहोरेका छन् । सोल्टीले ७६ करोड ११ लाख रुपैयाँ नाफा कमाएको छ तर कम्पनीको यो नाफा अघिल्लो आवको तुलनामा १६.५१ प्रतिशत कम हो ।  

यता तारागाउँ रिजेन्सी होटलले ७० करोड ५७ लाख, सिटी होटलले १७ करोड ३० लाख, होटल फरेस्ट इनले १५ करोड २७ लाख र ओरियन्टल होटलले ४ करोड ७४ लाख रुपैयाँ घाटा ब्यहोरेका छन् । समग्रमा चार होटल कम्पनीले १ अर्ब ७ करोड रुपैयाँ घाटा ब्यहोरेका छन् ।  

वित्तीय तथ्याङ्क केलाउँदा होटलहरुको आम्दानीमा समेत संकुचन आएको छ, जसकारण कम्पनीहरुले करोडौं घाटा ब्यहोर्नुपरेको हो ।  

विशेषगरी ठूलो लगानीमा निर्माण भएका होटलहरूले ऋण तथा ब्याजको भार धान्न नसक्दा वित्तीय अवस्था थप चुनौतीपूर्ण बनेको देखिन्छ ।  

होटल व्यवसायमा प्रतिस्पर्धा बढ्नु, सञ्चालन खर्च महँगिनु र आम्दानीअनुसार खर्चको वृद्धि उच्च हुनु पनि घाटाको प्रमुख कारणका रूपमा देखिएको छ । यसले पर्यटन क्षेत्रको व्यावसायिक गतिविधि बढ्दै गए पनि नेप्सेमा सूचीकृत होटल कम्पनीहरूको वित्तीय स्वास्थ्यमा अपेक्षित सुधार आउन नसकेको संकेत गरेको छ ।  

आगामी दिनमा पर्यटक आगमनसँगै होटलको अकुपेन्सी बढाउने, सञ्चालन लागत घटाउने, ऋणको भार व्यवस्थापन गर्ने तथा आम्दानीका नयाँ स्रोत विस्तार गर्न नसके होटल कम्पनीहरूको वित्तीय दबाब अझ बढ्न सक्ने देखिन्छ ।

Sponsored