नेपाल एयरलाइन्स निजी कम्पनी भएको भए खारेजी भइसक्थ्यो : पर्यटनमन्त्री पौडेल

काठमाडौँ। पर्यटनमन्त्री खड्कराज पौडेलले नेपाल वायुसेवा निगमको कमजोर व्यवस्थापन र वित्तीय अवस्थाप्रति गम्भीर असन्तुष्टि जनाउँदै तत्काल सुधार आवश्यक रहेको बताएका छन्।

प्रतिनिधिसभाअन्तर्गतको अन्तर्राष्ट्रिय तथा पर्यटन समितिको बैठकमा बोल्दै उनले निगम निजी कम्पनी भएको भए अहिले नै ‘लिक्विडेसन’ (खारेजी)मा पुगिसक्ने अवस्था रहेको टिप्पणी गरे। निगम सुधारका लागि नयाँ जहाज थप्नु मात्र पर्याप्त नहुने भन्दै उनले प्रभावकारी व्यवस्थापनलाई प्राथमिकता दिनुपर्ने बताए।

निगमका जहाजमा देखिने प्राविधिक समस्याले ठूलो आर्थिक क्षति भइरहेको उल्लेख गर्दै मन्त्री पौडेलले टोकियो र युरोपमा जहाज ग्राउन्डेड हुँदा यात्रु व्यवस्थापनमा निगमले करोडौँ रुपैयाँ अतिरिक्त खर्च बेहोर्नुपरेको बताए।

उनले निगममाथि बैंक तथा वित्तीय संस्थाले लिने ब्याजदरप्रति पनि असन्तुष्टि व्यक्त गरे। सामान्य व्यक्ति तथा संस्थालाई करिब ५ प्रतिशतसम्म ब्याजमा कर्जा दिने बैंकहरूले सरकारी स्वामित्वको निगमलाई भने १०.५ प्रतिशतसम्म ब्याज लिने गरेको भन्दै उनले यस्तो नीतिले निगमको आर्थिक संकट थप गहिरिने बताए।