ईसेवा मनि ट्रान्सफर र भिसा डाइरेक्टबीच रणनीतिक साझेदारी, अन्तर्राष्ट्रिय रेमिट्यान्स भुक्तानी थप सहज बनाउने

काठमाडौं । नेपालको डिजिटल रेमिट्यान्स कम्पनी ईसेवा मनि ट्रान्सफरले विश्वव्यापी डिजिटल भुक्तानी कम्पनी भिसा डाइरेक्टसँग रणनीतिक साझेदारी गरेको छ। कम्पनीले भिसा डाइरेक्ट प्लेटफर्म एकीकरण गर्दै नेपालमा अन्तर्राष्ट्रिय रेमिट्यान्स भुक्तानी प्रक्रियालाई थप सहज बनाउने घोषणा गरेको हो।

यस सहकार्यपछि विश्वभर रहेका सहभागी भिसा डाइरेक्टसक्षम साझेदारमार्फत नेपालमा रेमिट्यान्स पठाउने प्रक्रिया थप सहज हुने अपेक्षा गरिएको छ।

भिसा डाइरेक्ट, भिसाको विश्वव्यापी रकम स्थानान्तरणसम्बन्धी प्लेटफर्म हो। यसले योग्य कारोबारका लागि सहभागी वित्तीय संस्था तथा भुक्तानी सेवा प्रदायकमार्फत कार्ड, बैंक खाता तथा डिजिटल वालेटमा रकम पठाउन र प्राप्त गर्न सहयोग गर्छ।

यस प्लेटफर्मको एकीकरणले विदेशमा रहेका नेपालीलाई नेपालमा रहेका आफ्ना परिवार तथा आफन्तलाई रकम पठाउन थप सहज विकल्प उपलब्ध गराउने लक्ष्य राखिएको कम्पनीले जनाएको छ।

विश्वभर डिजिटल माध्यमबाट हुने अन्तरदेशीय भुक्तानी तथा रेमिट्यान्स सेवाको प्रयोग बढिरहेका बेला यो सहकार्यलाई महत्वपूर्ण मानिएको छ। अन्तर्राष्ट्रिय भुक्तानी सञ्जाललाई नेपालको रेमिट्यान्स पूर्वाधारसँग जोडेर नेपालमा रेमिट्यान्स प्राप्त गर्ने विभिन्न माध्यममा ग्राहकको पहुँच विस्तार गर्न यस सहकार्यले सहयोग पुर्‍याउने अपेक्षा गरिएको छ।

सहकार्यअन्तर्गत ईसेवा मनि ट्रान्सफरले आफ्नो भुक्तानी सञ्जालमार्फत उपलब्ध सेवाअनुसार बैंक खाता तथा ईसेवा वालेटमा रेमिट्यान्स भुक्तानीलाई सहजीकरण गर्नेछ। यसबाट नेपालमा रकम प्राप्त गर्ने ग्राहकले उपलब्ध विकल्पमध्ये आफ्नो आवश्यकताअनुसारको माध्यमबाट रकम प्राप्त गर्न सक्नेछन्।

यद्यपि, रकम प्राप्त गर्ने माध्यम सम्बन्धित साझेदार, कारोबारको मार्ग तथा लागू हुने सेवा सर्तअनुसार फरक हुन सक्ने कम्पनीले स्पष्ट पारेको छ।

ईसेवा मनि ट्रान्सफरका प्रमुख कार्यकारी अधिकृत अजेश कोइरालाले नेपालीका लागि रेमिट्यान्स सेवालाई सरल, छिटो र सहज बनाउनु कम्पनीको निरन्तर उद्देश्य रहेको बताए।

उनले भने, ‘भिसा डाइरेक्टसँगको सहकार्यले हाम्रो अन्तर्राष्ट्रिय भुक्तानी सञ्जाललाई थप सुदृढ बनाउनुका साथै नेपालमा रेमिट्यान्स प्राप्त गर्ने प्रक्रियालाई अझ सहज बनाउन सहयोग गर्नेछ। विश्वव्यापी भुक्तानी प्रविधि र ईसेवा मनि ट्रान्सफरको भुक्तानी सञ्जाललाई एकीकृत गर्दै विदेशमा रहेका नेपाली तथा नेपालमा उनीहरूका परिवारका लागि थप सहज र पहुँचयोग्य रेमिट्यान्स सेवा प्रदान गर्ने हाम्रो लक्ष्य छ।’

यो सेवा हाल सहभागी भिसा डाइरेक्टसक्षम साझेदारमार्फत नेपालमा रेमिट्यान्स पठाउन उपलब्ध गराइएको छ। सेवा उपलब्धता, रकम प्राप्त गर्ने माध्यम तथा कारोबारका सर्त सम्बन्धित साझेदार र लागू हुने व्यवस्थाअनुसार निर्धारण हुनेछन्।

ईसेवा मनि ट्रान्सफर नेपाल राष्ट्र बैंकबाट इजाजतप्राप्त रेमिट्यान्स कम्पनी तथा एफ–१ सफ्ट ग्रुपको भागिनी कम्पनी हो। सन् २०१९ मा स्थापना भएको कम्पनीले अन्तर्राष्ट्रिय साझेदारको सञ्जालमार्फत नेपालमा विप्रेषण सेवा प्रदान गर्दै आएको छ। कम्पनीले बैंक खाता, ईसेवा वालेट तथा नगद भुक्तानी केन्द्रमार्फत रकम प्राप्त गर्न सकिने व्यवस्था गर्दै आएको छ।

डिजिटल नवप्रवर्तन, अन्तर्राष्ट्रिय साझेदारी तथा ग्राहकको सहज पहुँचलाई प्राथमिकता दिँदै कम्पनीले नेपालमा रेमिट्यान्स सेवालाई थप सरल, प्रभावकारी र पहुँचयोग्य बनाउने लक्ष्य राखेको जनाएको छ।

भिसा डिजिटल भुक्तानी क्षेत्रमा विश्वव्यापी रूपमा सक्रिय कम्पनी हो। कम्पनीले विश्वका २०० भन्दा बढी देश तथा क्षेत्रमा उपभोक्ता, व्यवसाय, वित्तीय संस्था र सरकारी निकायबीच डिजिटल भुक्तानी तथा रकम स्थानान्तरणलाई सहजीकरण गर्दै आएको छ।

भिसा डाइरेक्टले सहभागी वित्तीय संस्था तथा भुक्तानी सेवा प्रदायकमार्फत योग्य घरेलु तथा अन्तरदेशीय कारोबारका लागि समर्थित कार्ड, बैंक खाता तथा डिजिटल वालेटमा रकम पठाउन सहयोग गर्छ।