भाइटीकामा सशस्त्र प्रहरीको निःशुल्क बस, २ हजार ४८६ यात्रुले लिए सेवा

काठमाडौं । भाइटीकाका दिन सशस्त्र प्रहरी बल, नेपालले काठमाडौं उपत्यका र भक्तपुरमा सञ्चालन गरेको निःशुल्क बस सेवाबाट २ हजार ४८६ यात्रु लाभान्वित भएका छन् ।

बुधबार बिहान ८ बजेदेखि बेलुकी ५ बजेसम्म सञ्चालन गरिएको सेवामध्ये काठमाडौं रिङरोड क्षेत्रमा १ हजार ७६६ र भक्तपुर रुटमा ७२० जनाले यात्रा गरेका सशस्त्र प्रहरीका सहप्रवक्ता डीएसपी शैलेन्द्र थापाले जानकारी दिए ।

सार्वजनिक यातायात न्यून सञ्चालन हुने चाडपर्वका बेला नागरिकलाई सहज आवतजावतको सुविधा दिने उद्देश्यले सशस्त्र प्रहरीले तीनवटा बसमार्फत विभिन्न रुटमा सेवा सञ्चालन गरेको थियो ।

सशस्त्र प्रहरीका अनुसार चाडपर्वमा यातायात अभावका कारण सर्वसाधारणले भोग्नुपर्ने समस्या कम गर्न निःशुल्क बस सेवा सञ्चालन गरिएको हो ।