लाभांश घोषणासहित हिमालयन डिष्टिलरीले डाक्यो एजीएम, बुक क्लोज कहिले ?

काठमाण्डौ । हिमालयन डिष्टिलरीको मंसिर २३ गते बसेको सञ्चालक समितिको बैठकले सेयरधनीहरुलाई लाभांश प्रस्ताव गरेको छ । बैठकले आव २०८०/८१ सम्मको कम्पनीको सञ्चित मुनाफा समेतबाट कम्पनीको हाल कायम चुक्तापूँजीको १५ प्रतिशत बोनस सेयर र ५ प्रतिशत नगद लाभांश(कर प्रयोजनका लागि समेत) गरी कुल २० प्रतिशत लाभांश प्रदान गर्ने निर्णय गरेको हो ।  

लाभांश पारित गर्न कम्पनीले साधारण सभा र बुक क्लोजको मिति समेत तय गरेको छ । उक्त बैठकले कम्पनीको २४ औं साधारण सभा पुस २८ गते विरगञ्जमा रहेको कम्पनीको रजिष्टर्ड कार्यालयमा बिहान १० बजेदेखि सुरु गर्ने निर्णय गरेको छ ।  

उक्त सभामा कम्पनीको प्रस्तावित लाभांशका साथै अन्य वित्तीय विवरणहरु समेत पारित गरिनेछ ।  

साधारण सभा तथा लाभांश वितरण प्रयोजनका लागि कम्पनीले पुस १९ गते एक दिनका लागि बुक क्लोज गर्ने निर्णय गरेको छ । यसर्थ पुस १८ गतेसम्म नेप्सेमा कारोबार भई कायम भएका सेयरधनीहरु मात्रै कम्पनीद्वारा प्रस्तावित लाभांश पाउन र सभामा भाग लिन योग्य हुनेछन् ।