धितोपत्र बोर्डद्वारा ६ हाइड्रोको डेढ करोड कित्ता आइपीओ निष्कासनमा रोक

काठमाण्डौ । नेपाल धितोपत्र बोर्डले ६ वटा हाइड्रोपावर कम्पनीको आइपीओ निष्कासनमा तत्कालका लागि रोक लगाएको छ । बोर्डले ६ कम्पनीको साढे एक अर्ब रुपैयाँभन्दा बढीको आइपीओ निष्कासनमा रोक लगाएको हो ।  

बोर्डले आइपीओ निष्कासनको अनुमतिको लागि पाइपलाइनमा रहेका १४ वटा कम्पनीलाई सूचीबाट हटाएको हो । जसमा ६ वटा हाइड्रो कम्पनी रहेका छन् ।  

बोर्डका अनुसार पीपीए नगरिकन प्रक्रिया अघि बढाएका र नेटवर्थ ९० भन्दा तल रहेका कम्पनीहरुका लागि हालको लागि सूचीबाट हटाइएको हो । उक्त कम्पनीहरुले ९० रुपैयाँ वा सो भन्दा बढी नेटवर्थ पुर्याएर मात्रै अर्को निवेदन दिन सकिने बोर्डले जनाएको छ ।  

बोर्डले पाइपलाइनबाट हटाएका हाइड्रो कम्पनीहरुमा लाफिङ बुद्ध पावर, युनिक हाइड्रेल कम्पनी, बेनि हाइड्रोपावर, पुवा खोला वन हाइड्रोपावर, सानिमा हाइड्रोपावर र रिचेत जलविद्युत कम्पनी रहेका छन् ।  

उक्त कम्पनीहरुको नेटवर्थ ९० रुपैयाँभन्दा कम भएकाले नै पाइपलाइनबाट हटाइएको बोर्डले जनाएको छ । बोर्डका अनुसार लाफिङ बुद्ध पावरले ६५ करोड ७७ लाख रुपैयाँ बराबरको ६५ लाख ७७ हजार कित्ता आइपीओ निष्कासनको लागि अनुमति मागेको थियो ।  

त्यस्तै, युनिक हाइड्रेल कम्पनीले २२ करोड रुपैयाँ बराबरको २२ लाख कित्ता, बेनि हाइड्रोले २० करोड ८० लाख रुपैयाँ बराबरको २० लाख ८० हजार कित्ता, पुवा खोला वन हाइड्रोले १९ करोड ४६ लाख ६६ हजार रुपैयाँ बराबरको १९ लाख ४६ हजार ६६० कित्ता, सानिमा हाइड्रोले १४ करोड ७० लाख रुपैयाँ बराबरको १४ लाख ७० हजार कित्ता र रिचेत जलविद्युत कम्पनीले ११ करोेड ७६ लाख ४५ हजार रुपैयाँ बराबरको ११ लाख ७६ हजार ४५० कित्ता आइपीओ निष्कासनका लागि बोर्डसँग अनुमति मागेका थिए ।