म्युचुअल फण्डहरुको नाफा ५.३६% ले घट्यो, न्याभ र लगानीमा देखिएन सुधार

काठमाण्डौ । म्युचुअल फण्डहरुले ३ अर्ब रुपैयाँभन्दा बढी नाफा कमाएका छन् । सञ्चालनमा रहेका ४२ म्युचुअल फण्डले चालु आवको १० महिनासम्म ३ अर्ब २९ करोड २० लाख रुपैयाँ मुनाफा कमाएका छन् ।  

यो नाफा अघिल्लो महिनाको तुलनामा २.१० प्रतिशत कम हो । चैत मसान्तसम्म म्युचुअल फण्डहरुले ३ अर्ब ३६ करोड २६ लाख रुपैयाँ नाफा कमाएका थिए ।  

सो अवधिसम्म आइपुग्दा ३७ म्युचुअल फण्ड नाफामा देखिएका छन् भने ५ फण्डले घाटा ब्यहोरेका छन् । तर नाफामा रहेका ३७ फण्डमध्ये पनि १४ वटा फण्डको मात्रै नाफा गत महिनाको तुलनामा बढेको छ भने बाँकी सबैको घटेको छ ।  

म्युचुअल फण्डहरुको अर्बौ रकम सेयरबजारमा लगानी रहेको हुन्छ । बजारमा थोरै अंकको मात्रै उतारचढाव आउँदा पनि फण्डहरुको वित्तीय अवस्था नै फेरबदल हुने अवस्था आउँदछ । फण्डहरुको बजारमा ठूलो लगानी हुने भएकाले बजार बढ्दा फण्डहरुको नाफा, न्याभ र लगानीको अवस्थामा सुधार देखिन्छ, भने बजार घट्दा यी सूचकहरु प्रभावित देखिन्छन् ।  

चैत महिनाको अन्तिम कारोबार दिन २६६१ को विन्दुमा रहेको नेप्से परिसूचक वैशाख महिनाको अन्तिम कारोबार दिनसम्म १.५६ प्रतिशतले घटेर २६२० विन्दुमा कायम भएको छ । बजार सामान्य घट्दा पनि आधा भन्दा बढी म्युचुअल फण्डहरुको नाफामा गिरावट आएको छ ।  

सो अवधिसम्म सबैभन्दा बढी नाफा कमाउने फण्डमा प्रभु सेलेक्ट फण्ड रहेको छ । उक्त फण्डले २३ करोड २२ लाख रुपैयाँ नाफा कमाएको छ । फण्डको नाफा अघिल्लो महिनाको तुलनामा ५.१९ प्रतिशत बढी हो ।  

त्यस्तै, सिद्धार्थ इक्विटी फण्डले पनि २१ करोड ६८ लाख रुपैयाँ नाफा कमाएको छ । यो नाफा पनि अघिल्लो महिनाको तुलनामा १०।५० प्रतिशत बढी हो ।  

त्यस्तै, सबैभन्दा बढी नाफा बृद्धि गर्नेमा भने एनआइसी एशिया ग्रोथ फण्ड–२ रहेको छ । फण्डको नाफा चैत महिनाको तुलनामा २२.०८ प्रतिशत बृद्धि भएको छ ।  

वैशाख महिनासम्ममा ४ वटा म्युचुअल फण्ड भने घाटामा रहेका छन् । रिलायबल समृद्धि योजनाले ४३ लाख ७९ हजार, एनआइबीएल समृद्धि फण्ड–२ ले २१ करोड ४२ लाख, मेगा गरिमा समृद्धि योजनाले ४३ लाख ७९ हजार रुपैयाँ घाटा ब्यहोरेका छन् ।  

न्याभ कुनको कति  ?

चालु आवको वैशाख महिनासम्म सबैभन्दा बढी प्रतिइकाई खुद सम्पत्ति मूल्य (न्याभ) हिमालयन ८०–२० को रहेको छ । उक्त फण्डको न्याभ १२.६६ रुपैयाँ छ ।  

न्याभ भनेको म्युचुअल फण्डहरुको प्रतिइकाई वास्तविक मूल्य हो, जसलाई खुद सम्पत्ति मूल्य पनि भनिन्छ । यसैका आधारमा म्युचुअल फण्डका इकाई खरिद बिक्री हुने गर्दछ ।  

बजारमा प्रत्येक कारोबारमा परिवर्तन हुनसक्ने सेयरमूल्यहरु विपरीत म्युचअल फण्डको न्याभ दैनिक आधारमा गणना गरिन्छ । वैशाख मसान्तसम्म हिमालयन ८०–२०, प्रभु स्मार्ट र सेलेक्ट फण्ड, एनएमबी सुलभ इन्भेष्टेमन्ट फण्ड–२ र ग्लोबल आइएमई ब्यालेन्स्ड फण्ड–१ को न्याभ १२ रुपैयाँ भन्दा बढी छ ।  

त्यस्तै, सिद्धार्थ इन्भेष्मेन्ट ग्रोथ स्किम–३ सँगै १९ वटा म्युचुअल फण्डको न्याभ ११ रुपैयाँभन्दा बढी र सिटिजन्स सुपर ३० म्युचुअल फण्डसँगै १५ वटा फण्डको न्याभ १० रुपैयाँमाथि र तीनवटा फण्डको न्याभ भने ९ रुपैयाँभन्दा माथि रहेको छ ।  

सेयरबजारमा रु.४२.६१ अर्बको लगानी  

म्युचुअल फण्डहरुको सेयरबजारमा ४२ अर्ब ६१ करोड रुपैयाँभन्दा बढीको लगानी रहेको छ । वैशाख महिनासम्म ४२ फण्डको सेयरबजारमा गरेको लगानीको भ्यालु ४२ अर्ब भन्दा बढी पुगेको छ ।  

चैत महिनासम्म यस्तो लगानी भ्यालु ४२ अर्ब ४१ करोड रुपैयाँ रहेको थियो । यसर्थमा म्युचुअल फण्डहरुको सेयरबजारमा गरेको लगानी भ्यालु ०.४८ प्रतिशतले मात्रै बृद्धि भएको छ ।  

सो अवधिसम्म १९ वटा फण्डको यस्तो लगानी भ्यालु बढेको छ भने २२ वटा फण्डको घटेको छ ।  

वैशाखसम्म सबैभन्दा बढी सेयरबजारमा लगानी एनआइबीएल सहभागिता फण्डको रहेको छ । उक्त फण्डको बजारमा गरेको लगानी भ्यालु ४ अर्ब ६२ करोड ३२ लाख रुपैयाँ रहेको छ । उक्त फण्डको यस्तो लगानी भ्यालु ०.९५ प्रतिशतले बढेको छ ।  

त्यस्तै, एनएमबी सरल बचत फण्ड–इ को २ अर्ब ६६ करोड रुपैयाँ रहेको छ । फण्डको लगानी भ्यालु भने ०.०१ प्रतिशतले घटेको छ । चैत महिनाको  तुलनामा सबैभन्दा बढी लगानी बढाउने अर्थात् लगानी भ्यालु बढाउने फण्डमा भने गरिमा समृद्धि योजना रहेको छ । उक्त फण्डको लगानी भ्यालु ३२.६७ प्रतिशतले बृद्धि भएको छ ।