गत आवमा १५ कम्पनीले मात्रै पाए आईपीओको अनुमति, पौने ५४ अर्बको सेयर निष्कासन अझै पेन्डिङमा

Capital Market
बिहीबार, श्रावण १,२०८२ 17:58:56

काठमाण्डौ । आर्थिक वर्ष २०८१/८२ मा जम्मा १५ कम्पनीले मात्रै आईपीओ निष्कासनको अनुमति पाएका छन् । गत आवमा लामो समयसम्म नेपाल धितोपत्र बोर्ड अध्यक्षबिहिन रहँदा १५ कम्पनीले मात्रै आईपीओको स्वीकृति पाएका हुन् ।

धितोपत्र बोर्डले २०८१ मंसिर महिनादेखि मात्रै आईपीओ निष्कासनको लागि अनुमति दिन थालेको हो । धितोपत्र बोर्ड ७–८ महिनासम्म अध्यक्षबिहिन हुँदा कम्पनीहरुले आईपीओ निष्कासनको अनुमति पाएका थिएनन् ।

गत वर्ष मंसिर १० गते धितोपत्र बोर्डको अध्यक्षमा सन्तोषनारायण श्रेष्ठ नियुक्त भएसँगै कम्पनीहरुले धमाधम आईपीओ निष्कासनको अनुमति पाएका हुन् । श्रेष्ठ अध्यक्ष बनेपछि मात्रै १३ वटा कम्पनीले साधारण सेयर जारी गर्ने अनुमति पाएका छन् ।

श्रेष्ठ आउनुअघि गार्डियन माइक्रो लाइफ र नेपाल माइक्रो इन्स्योरेन्सले मात्रै आईपीओका लागि अनुमति पाएका थिए । गत आवमा १५ कम्पनीले कुल ३ अर्ब ९२ करोड ७२ लाख रुपैयाँबराबरको ३ करोड ९२ लाख ७२ हजार २९४ कित्ता सेयर जारी गर्ने अनुमति पाएका छन् । जसमा तीन माइक्रो इन्स्योरेन्स कम्पनी, ६ वटा हाइड्रो कम्पनी, एक माइक्रो फाइनान्स, एक होटल तथा पर्यटन, एक उत्पादन तथा पर्यटन र दुई अन्य समूहका कम्पनी रहेका छन् ।

बोर्डका अध्यक्ष श्रेष्ठले पछिल्लो समय पाइपलाइनमा रहेका हाईड्रो कम्पनीहरुको फाइल हेरेर ९० रुपैयाँभन्दा बढी नेटवर्थ भएका कम्पनीलाई आईपीओ निष्कासनको अनुमति दिन थालेका छन् । गत आवमा १५ कम्पनीले सेयर निष्कासनको अनुमति पाएर ९ कम्पनीले सेयर निष्कासनको प्रक्रिया सम्पन्न गरिसकेका छन् भने ६ वटा कम्पनीको भने बाँकी रहेको छ । ६ मध्येपनि चार कम्पनी दरमखोला, माबिलुङ इनर्जी, स्वष्तिक लघुवित्त र बुङ्खल हाइड्रोले पहिलो चरणको आइपीओ निष्कासन गरिसकेका छन् भने दोस्रो चरणको आईपीओ निष्कासन हुन बाँकी छ ।

साथै बन्दिपुर केवलबार र झापा इनर्जी लिमिटेडले भने दुई चरणकै आईपीओ निष्कासन गर्न बाँकी रहेको छ । यसरी बोर्डबाट आईपीओ निष्कासनको अनुमति पाइसकेका ६ वटा कम्पनीको सर्वसाधारणमा कुल १ अर्ब ५७ करोड ८७ लाख रुपैयाँ बराबरको १ करोड ५७ लाख, ८७ हजार ५ कित्ता आईपीओ जारी हुन बाँकी रहेको छ ।

अझैपनि आईपीओ निष्कासनको अनुमति माग्दै धितोपत्र बोर्डको पाइपलाइनमा ७२ वटा कम्पनी छन् । सम्भवतः आव २०८२–८३ मा गत आवमा भन्दा धेरै कम्पनीले आईपीओ निष्कासनको अनुमति पाउनेछन् ।

बोर्डका अनुसार ७२ कम्पनीको कुल ५३ अर्ब ८४ करोड २४ लाख ९२ हजार ६६१ रुपैयाँबराबरको ३७ करोड १४ लाख १३ हजार ३८३ कित्ता आईपीओ निष्कासनको लागि पाइपलाइनमा रहेको छ ।