बाराही हाईड्रोपावरको नाफा ३२% ले घट्यो, रिजर्भ पनि ऋणात्मक

काठमाण्डौ । बाराही हाईड्रोपावर पब्लिक लिमिटेडको प्रशासनिक खर्च बढ्दा नाफामा कमी आएको छ । कम्पनीले चालु आर्थिक वर्षको दोस्रो त्रैमाससम्म कम्पनीले २३ लाख २९ हजार रुपैयाँबराबरको खुद नाफा आर्जन गरेको छ । यो रकम अघिल्लो आवको सोही अवधिको तुलनामा ३२.५० प्रतिशतले कम हो ।

अघिल्लो आवको सोही अवधिसम्म भने कम्पनी ३४ लाख ५१ हजार रुपैयाँ खुद नाफा कमाएको थियो ।

कम्पनीले विद्युत बिक्रीमार्फत २ करोड ६ लाख आर्जन गरेको छ । अघिल्लो आवमा भने कम्पनीले विद्युत बिक्रीमार्फत २ करोड ५ लाख आर्जन गरेको थियो । कम्पनीले सञ्चालन खर्च घटाएको छ । अघिल्लो आवमा ८ लाख ८८ हजार रुपैयाँ रहेको सञ्चालन खर्च ४ लाख ७६ हजारमा सीमित बनेको छ । यो अवधिमा प्रशासनिक खर्च भने २८ लाख २६ हजारबाट बढेर ३१ लाख ३१ हजार रुपैयाँ पुगेको छ ।  

यस्तै कम्पनीको वित्त खर्च १ करोड १ लाखबाट घटेर ८३ करोड ७१ लाखमा सीमित बनेको छ ।  

कम्पनीको चुक्तापूँजी २५ करोड रुपैयाँ छ भने रिजर्भको आकार १२ करोड २१ लाख रुपैयाँले ऋणात्मक अवस्थामा छ । कम्पनीको कुल चालु सम्पत्ति ७ करोड ६५ लाख र कुल चालु दायित्व ५ करोड ७५ लाख रुपैयाँ छ ।  

कम्पनीको प्रतिसेयर आम्दानी(त्रैमासिक)०.९३ रुपैयाँ, प्रतिसेयर नेटवर्थ ५१.१२२ रुपैयाँ, प्रतिसेयर कुल सम्पत्तिको मूल्य १४७.२८ रुपैयाँ, मूल्य आम्दानी अनुपात ५९६.५९ गुणा र तरलता अनुपात १.३३ प्रतिशत कायम छ ।