जनताको अधिकारको पक्षमा इमानदारितापूर्वक काम गर्नेछु : मनिष खनाल

काठमाण्डौ । राष्ट्रिय स्वतन्त्र पार्टीबाट प्रतिनिधिसभाको निर्वाचनमा नवलपुर क्षेत्र नम्बर २ बाट बिजयी भएका मनिष खनालले न्याय, सुशासन र जनताको अधिकारको पक्षमा इमानदारितापूर्वक काम गर्ने प्रतिबद्धता व्यक्त गरेका छन् ।    

खनाल आफैं जेनजी युवा भएका कारण भदौ २३ गते आन्दोलनमा शरिद भएकाहरुको सपना र त्यागलाई सम्मान गर्दै न्याय र सुशासनको पक्षमा काम गर्ने बताएका हुन् ।

उनले नवलपुर क्षेत्र नं. २ बाट कुल ४१ हजार ३४७  मत ल्याएर बिजयी भएका हुन् ।

सामाजिक सञ्जाल फेसबुकमा लामो पोष्ट राख्दै उनले भनेका छन्, ‘नवलपुर–२ को यो ऐतिहासिक विजय र ममाथि देखाउनुभएको प्रगाढ विश्वासका लागि म हृदयदेखि आभारी छु। यो विजय मेरो व्यक्तिगत सफलता होइन परिवर्तनको पक्षमा उभिएका सम्पूर्ण नवलपुरवासीको साझा जीत हो ।

यो चुनाव सामान्य परिस्थितिमा भएको चुनाव थिएन । देश कठिन समय र राजनीतिक अन्योलताबाट गुज्रिरहेको बेला तपाईंहरूले परिवर्तनको पक्षमा साहसी निर्णय गर्नुभएको छ । यस ऐतिहासिक निर्णयले नेपाली जनताको विवेक, साहस र लोकतन्त्रप्रतिको आस्थालाई पुनः एकपटक प्रमाणित गरेको छ ।

यस महत्वपूर्ण क्षणमा म जेन–जी विद्रोहका महान शहीदहरू तथा लोकतन्त्र, न्याय र स्वतन्त्रताका लागि आफ्नो जीवन अर्पण गर्ने सम्पूर्ण ज्ञात–अज्ञात शहीदहरूप्रति भावपूर्ण श्रद्धाञ्जली अर्पण गर्दछु। घाइते योद्धाहरूको त्यागलाई म सधैं स्मरण गरिरहनेछु । ४१,३४७ मत केवल मेरो पक्षमा परेको मत होइन । यो नयाँ पुस्ताको आवाज हो, आशाको मत हो, र स्वच्छ तथा उत्तरदायी राजनीति चाहने जनताको स्पष्ट अभिमत हो । 

हाम्रो समाजमा लामो समयदेखि फैलाइएको, राजनीति गर्न पैसा चाहिन्छ, पहुँच चाहिन्छ र सामान्य परिवारबाट आएको मानिसले चुनाव जित्न सक्दैन भन्ने भ्रमलाई तपाईंहरूले तोड्नुभएको छ । सामान्य परिवारमा हुर्किएको एउटा भुईँमान्छेले पनि निष्ठा, इमानदारीता र जनविश्वासका बलमा चुनाव जित्न सक्छ भन्ने विश्वास पुनः स्थापित भएको छ। यो परिणामले जनता सार्वभौम र विवेकी छन् भन्ने सत्यलाई फेरि प्रमाणित गरेको छ ।

भाद्र २३ मा राज्यको अकर्मण्यताका कारण हत्या गरिएका हाम्रा साथीहरूको तस्बिर हाम्रो हृदयमा ताजा छन् । उनीहरूको सपना र त्यागलाई सम्मान गर्दै म सधैं न्याय, सुशासन र जनताको अधिकारको पक्षमा इमानदारीपूर्वक काम गर्ने प्रण गर्दछु ।  

संसदमा पुग्नु मात्र ठूलो कुरा होइन त्यहाँ पुगेर जनताको आवाजलाई निर्भीक रूपमा उठाउनु र देशका लागि सही नीतिनियम निर्माणमा इमानदारीपूर्वक योगदान दिनु नै मेरो वास्तविक जिम्मेवारी हुनेछ ।

म एउटा दलको प्रतिनिधि मात्र होइन, नवलपुर क्षेत्र नं. २ का सम्पूर्ण जनताको साझा प्रतिनिधि हुँ । आगामी पाँच वर्ष पद र प्रतिष्ठाका लागि होइन, सेवा, उत्तरदायित्व, जवाफदेहिता र नयाँ राजनीतिक संस्कारको निर्माणका वर्षहरू हुनेछन् । तपाईंहरूले दिएको विश्वासलाई म शब्दले होइन, कर्मले प्रमाणित गर्नेछु ।

पुनः एकपटक, मप्रति विश्वास गर्ने सम्पूर्ण मतदाता, सिङ्गो राष्ट्रिय स्वतन्त्र पार्टी पंक्ति, शुभेच्छुक र सहयोगीहरूप्रति नतमस्तक हुँदै कृतज्ञता व्यक्त गर्दछु। यात्रा भर्खर सुरु भएको छ । तपाईंहरूको साथ, सुझाव र मार्गदर्शन सधैं अपेक्षित रहनेछ ।’