नेप्सेले गर्यो ‘धितोपत्र व्यापारी कार्यविधि संशोधन’, लगानीको सिमा बढ्यो

काठमाण्डौ । नेपाल स्टक एक्सचेञ्ज (नेप्से)ले ‘धितोपत्र व्यापारी (स्टक डिलर)कार्य सञ्चालन सम्बन्धी कार्यविधि, २०७७’मा पहिलो संशोधन गरेको छ । पूँजीबजारलाई थप गतिशिल, व्यवस्थित र तरल बनाउने उद्देश्यले नेप्सेले उक्त कार्यविधि संशोधन गरेको हो ।  

संशोधित कार्यविधिअनुसार स्टक डिलरहरुका  लागि लगानीको दायरा फराकिलो बनाइएको छ । स्टक डिलरहरूले साधारण शेयर (इक्विटी) मा मात्र सीमित नभई सरकारी ऋणपत्र, म्युचुअल फण्ड र डिबेन्चरहरूमा समेत सहजै कारोबार गर्न पाउने छन् ।

यसका लागि धितोपत्रको परिभाषालाई विस्तार गरिएको संशोधित कार्यविधिमा उल्लेख गरिएको छ ।

यसका साथै स्टक डिलरहरूले नाफामा नगइसकेका तर सम्भावना भएका कम्पनीहरूको शेयर पनि खरिद गर्न सक्नेछन् । यसअघि स्टक डिलरले विगत ३ वर्षदेखि लगातार नाफामा रहेका कम्पनीको शेयर मात्र खरिद गर्न पाउने प्रावधान थियो । नयाँ व्यवस्थाले यो प्रतिबन्ध हटाएको छ ।  

यस्तै, विगत एक वर्षको कुल कारोबार दिनमध्ये कम्तिमा ८० प्रतिशत दिन कारोबार भएको हुनुपर्ने साविकको व्यवस्थालाई पनि खारेज गरिएको छ । यद्यपि, नयाँ व्यवस्था अनुसार नेप्सेमा सूचीकृत भएको कम्तिमा ६ महिना पुगेका कम्पनीको शेयर मात्र स्टक डिलरले खरिद गर्न पाउने छन् ।

त्यस्तै, संशोधित कार्यविधिले स्टक डिलरले खरिद गर्न सक्ने कम्पनीको न्यूनतम चुक्ता पूँजीको सीमा बढाएको छ । अब कम्तिमा २५ करोड रुपैयाँ चुक्ता पूँजी भएका कम्पनीको सेयर मात्र डिलरले किन्न पाउनेछन्, जुन यसअघि २० करोड रुपैयाँ थियो । 

त्यस्तै, स्टक डिलरले दैनिक रूपमा गर्ने खुद कारोबार रकम आफ्नो नेटवर्थको अधिकतम ६० प्रतिशतसम्म पुरÞ्याउन पाउने व्यवस्था गरिएको छ ।