धितोपत्र कारोबार संचालन विनियमावली संशोधन, कम्पनीको सेयरभाउ अब १५% सम्म घटबढ हुने

काठमाण्डौ । नेपाल स्टक एक्सचेञ्ज (नेप्से)ले ‘धितोपत्र कारोबार सञ्चालन विनियमावली, २०७५’मा संशोधन गरेको छ । पूँजीबजारको कारोबारलाई थप फराकिलो र चलायमान बनाउन नेप्सेले उक्त विनियमावली संशोधन गरेको हो ।  

संशोधित व्यवस्थाअनुसार अब सूचीकृत कम्पनीहरुको सेयर मूल्यमा लाग्दै आएको सर्किट सीमा र प्री–ओपन सेसनको मापदण्डमा परिवर्तन गरिएको छ ।  

नेप्सेका अनुसार नेपाल धितोपत्र बोर्ड (सेबोन) बाट विनियमावली संशोधनको आधिकारिक पत्र नेप्सेमा पुगेपनि प्राविधिक रुपमा कहिलेदेखि कार्यान्वयनमा लागू गर्ने निर्णय भने भइसकेको छैन । अब चाँडै संचालक समितिको बैठक बसेर कार्यान्वयनमा ल्याउने तयारी गरिने नेप्सेले जनाएको छ ।  

नेप्सेका अनुसार सेबोनबाट स्वीकृत भई आएको संशोधित विनियमावलीमा सूचीकृत कम्पनीको दैनिक सेयर मूल्य घटबढ हुन पाउने सीमालाई १० प्रतिशतबाट बढाएर १५ प्रतिशत पुर्याइएको छ । जसअनुसार अब सूचीकृत कम्पनीको सेयरभाउ १० प्रतिशत नभई १५ प्रतिशतसम्म बढ्न सक्नेछ ।  

यसै क्रममा, बजार खुल्नुअघि सञ्चालन हुने ‘प्री–ओपन सेसन’ (बिहान १०ः३० देखि १०ः४५ बजेसम्म) मा लागू हुने मूल्य सीमामा पनि परिवर्तन गरिएको छ । अब उक्त सेसनमा सेयरको मूल्य अधिकतम ५ प्रतिशतसम्म घटबढ गर्न पाइनेछ । यसअघि यो सीमा निकै न्यून भएकाले बजार खुल्नेबित्तिकै मूल्य सन्तुलनमा समस्या देखिने गरेको थियो ।  

त्यस्तै, नेप्से इन्डेक्सको सर्किट ब्रेकर प्रणालीमा पनि संशोधन गरिएको छ । नयाँ व्यवस्थाअनुसार कारोबार सुरु भएको पहिलो दुई घण्टाभित्र नेप्से परिसूचक ५ प्रतिशतले बढे वा घटेमा कारोबार १५ मिनेका लागि स्थगन गरिनेछ । यसअघि ४ प्रतिशत वा घटे वा बढेमा २० मिनेटसम्म बजार स्थगित गर्ने व्यवस्था थियो ।  

साथै ५ प्रतिशतको ब्रेकपछि बजार खुलेर नेप्से परिसूचक ८ प्रतिशतले घटे वा बढेमा उक्त दिनको लागि सम्पूर्ण कारोबार बन्द हुनेछ । यसअघि ६ प्रतिशतले बजार घटबढ भएमा बजार बन्द हुने व्यवस्था थियो ।