होर्मुज जलमार्ग पुनः बन्द !

काठमाण्डौ । मध्यपूर्वमा तनाव बढ्दै गएको बीच इरानले होर्मुज जलमार्ग पुनः बन्द गरेको दाबी गरिएको छ । यसका कारण उक्त रणनीतिक समुद्री मार्गमा जहाज आवागमन लगभग ठप्प भएको बताइएको छ।

समुद्री ट्र्याकिङ सेवा म्यारिन ट्राफिकको प्रारम्भिक विवरण अनुसार हाल उक्त मार्ग हुँदै कुनै पनि ठूलो व्यापारिक जहाज गुज्रिरहेको देखिएको छैन। केही जहाजहरू ओमान र युएईको तटीय क्षेत्रमा रोकिएको अवस्थामा देखिएको रिपोर्टहरूमा उल्लेख छ।

रिपोर्टहरूका अनुसार शनिबार केही जहाजहरूले जलमार्ग पार गर्ने क्रममा आक्रमणको सामना गर्नुपरेको दाबी गरिएको छ। एक तेल ट्यांकरमाथि इरानी गनबोटबाट गोली प्रहार गरिएको भन्ने पनि जानकारी सार्वजनिक भएको छ।  

साथै, इरानको रिभोलुसनरी गार्ड्सले दुई भारतीय जहाजलाई लक्षित गरी फायरिङ गरेको कारण ती जहाजहरूले आफ्नो मार्ग परिवर्तन गर्नुपरेको दाबी गरिएको छ।

होर्मुज जलमार्ग विश्वको सबैभन्दा महत्वपूर्ण ऊर्जा ढुवानी मार्गमध्ये एक मानिन्छ, जहाँबाट विश्वको करिब २० प्रतिशत तेल तथा ग्यास आपूर्ति हुने गर्छ। यस मार्गमा कुनै पनि अवरोध वा तनाव उत्पन्न हुँदा अन्तर्राष्ट्रिय ऊर्जा बजारमा तत्काल प्रभाव पर्ने गर्दछ।

हालसम्म यी घटनाहरूको स्वतन्त्र पुष्टि प्रमुख अन्तर्राष्ट्रिय समाचार संस्थाहरूबाट औपचारिक रूपमा भएको छैन।

विशेषज्ञहरूका अनुसार यदि तनाव लामो समयसम्म जारी रह्यो भने तेल आपूर्ति श्रृंखलामा अवरोध आउन सक्ने र विश्व बजारमा ऊर्जा मूल्य वृद्धि हुने सम्भावना रहन्छ।