एनएमबि लघुवित्तको नाफा २१६% ले वृद्धि

काठमाण्डौ । खुद ब्याज आम्दानी बढेसँगै एनएमबि लघुवित्त वित्तीय संस्था लिमिटेडको नाफामा आकर्षक वृद्धि देखिएको छ । संस्थाले चालु आवको तेस्रो त्रैमाससम्ममा आफ्नो नाफा २१६.११ प्रतिशतले बढाएको छ । संस्थाले समीक्षा अवधिसम्म ८ करोड ७० लाख रुपैयाँ खुद नाफा आर्जन गरेको छ । अघिल्लो आवको सोही अवधिसम्म यस्तो रकम २ करोड ७५ लाखमा सीमित थियो ।  

यो अवधिमा संस्थाले ४४ करोड ४२ लाख रुपैयाँबराबरको खुद ब्याज आम्दानी गरेको छ । यो रकम अघिल्लो आवको तुलनामा ५९.४२ प्रतिशतले बढी हो । अघिल्लो आवको तेस्रो त्रैमाससम्म संस्थाको खुद ब्याज आम्दानी २७ करोड ८६ लाख रुपैयाँ रहेको थियो । संस्थाको खुद सञ्चालन आम्दानी ४९ करोड ६२ लाख रुपैयाँ पुगेको छ ।  

यो अवधिमा संस्थाको सञ्चालन मुनाफा १० करोड ८१ लाख रुपैयाँ रहेको छ । अघिल्लो आवमा यस्तो रकम २ करोड ७४ लाखमा सीमित थियो ।  

यस्तै संस्थाको वितरणयोग्य मुनाफा ६ करोड ७० लाख रहेको छ ।  

अघिल्लो आवमा २१ करोड २ लाख रुपैयाँ रहेको संस्थाको रिटेन्ड अर्निङ २४ करोड २६ लाख रुपैयाँ पुगेको छ । रिजर्भको आकार पनि २१ करोड २ लाखबाट बढेर २४ करोड २६ लाख रुपैयाँ पुगेको छ । संस्थाले सेयर प्रिमियम शीर्षकमा ७ करोड २९ लाख रुपैयाँ छुट्टाएको छ ।  

यो अवधिसम्म संस्थाले ग्राहकहरुबाट १ अर्ब ९४ करोड रुपैयाँ निक्षेप संकलन र ८ अर्ब १ करोड रुपैयाँबराबरको कर्जा प्रवाह गरेको छ । संस्थाको खराब कर्जा अनुपात ५.५९ प्रतिशतबाट बढेर १५.५० प्रतिशत पुगेको छ ।  

समीक्षा अवधिसम्म संस्थाको प्रतिसेयर आम्दानी(ईपीएस)१६.०८ रुपैयाँ, प्रतिसेयर नेटवर्थ १४२.४४ रुपैयाँ, प्रतिसेयर कुल सम्पत्तिको मूल्य १२१९.८५ रुपैयाँ, मूल्य आम्दानी अनुपात ४१.२९ गुणा र तरलता अनुपात ११.७५ प्रतिशत कायम भएको छ ।