समता घरेलु लघुवित्तको नाफामा उल्लेख्य सुधार, इपीएस र लाभांश क्षमता कति ?

काठमाण्डौ । समता घरेलु लघुवित्तको नाफामा उल्लेख्य सुधार देखिएको छ । चालु आवको तेस्रो त्रैमाससम्म संस्थाले ८ करोड २३ लाख रुपैैयाँ नाफा कमाएको छ । 

यो नाफा गत आवको सोही अवधिसम्मको तुलनामा २१४.७८ प्रतिशत बढी हो । गत आवको तेस्रो त्रैमाससम्म संस्थाले २ करोड ६१ लाख रुपैयाँ मात्रै नाफा कमाएको थियो ।  

संस्थाको ब्याज आम्दानीमा सुधार देखिदा नाफा वृद्धिमा टेवा पुगेको हो । गत आवको चैत मसान्तसम्म २० करोड ८५ लाख रुपैयाँ ब्याज आम्दानी गरेको यो संस्थाले चालु आवको सो अवधिसम्म आइपुग्दा ६३.६४ प्रतिशत बढाएर ३४ करोड १३ लाख रुपैयाँ ब्याज आम्दानी गर्न सफल भएको छ ।  

संस्थाको खराब कर्जा अनुपात भने ६.५३ प्रतिशतबाट बढेर १५ प्रतिशत पुगेको छ । साथै पूँजीकोष अनुपात सामान्य घटेर १२.४० प्रतिशत, सीडी रेसियो १०६.७९ प्रतिशत, कस्ट अफ फण्ड ६.१५ प्रतिशत, बेस रेट १०.६२ प्रतिशत र स्प्रेड दर ७.७८ प्रतिशत पुगेको छ ।  

संस्थाको प्रतिसेयर आम्दानी ५.५४ प्रतिशतबाट बढेर १६.६२ प्रतिशत पुगेको छ भने प्रतिसेयर नेटवर्थ १३९.५६ रुपैयाँ, मूल्य आम्दानी अनुपात ४७.४३ गुणा र तरलता अनुपात १७.८० प्रतिशत रहेको छ ।  

सो अवधिसम्म संस्थाले ५ करोड ७८ लाख रुपैयाँ तिवरणयोग्य मुनाफाको लागि छुट्याएको छ । यसर्थ सो अवधिसम्म संस्थाको लाभांश क्षमता ११.०४ प्रतिशत रहेको छ ।