विष्णु पक्राउपछि बस्नेतको कडा प्रतिक्रियाः ‘श्याल पल्कियो, गाह्रो हुने भो’

काठमाण्डौ । पूर्वअर्थमन्त्री तथा नेकपा एमालेका उपाध्यक्ष विष्णुप्रसाद पौड्याललाई सम्पत्ति शुद्धीकरण अनुसन्धानका क्रममा सुर्खेतबाट पक्राउ गरिएको भन्ने खबर सार्वजनिक भएपछि एमालेका सचिव महेश बस्नेतले त्यसप्रति कडा प्रतिक्रिया जनाएका छन्।

बस्नेतले सामाजिक सञ्जाल फेसबुकमार्फत प्रतिक्रिया दिँदै कानुनी राज्यमा पहिले तथ्य र प्रमाणको निष्पक्ष परीक्षण हुनुपर्ने र त्यसपछि मात्र कानुनी कारबाहीको प्रक्रिया अघि बढ्नुपर्ने बताएका छन्। उनले फरक राजनीतिक विचार राख्ने नेतृत्वमाथि प्रतिशोधको भावनाले प्रेरित भएर गिरफ्तारी गरिनु उचित नहुने टिप्पणी गरेका छन्।

“कानुनी राज्यमा पहिले तथ्य र प्रमाणको निष्पक्ष परीक्षण हुनुपर्छ, त्यसपछि मात्र कानुनी कारबाहीको प्रक्रिया अघि बढ्नुपर्छ,” बस्नेतले लेखेका छन्, “फरक राजनीतिक विचार राख्ने नेतृत्वमाथि प्रतिशोधको भावनाले प्रेरित भएर गिरफ्तारी गरिनु उचित मान्न सकिँदैन।”

बस्नेतले पौड्यालमाथिको घटनालाई केवल एक नेताको व्यक्तिगत विषयका रूपमा नबुझ्न एमाले पंक्तिलाई आग्रह गरेका छन्। उनका अनुसार, यो विषय लोकतान्त्रिक अधिकार, राजनीतिक स्वतन्त्रता र विधिको शासनसँग प्रत्यक्ष जोडिएको छ।

उनले प्रतीकात्मक भाषामा लेखेका छन्, “कुखुरा मर्‍यो भन्दा पनि श्याल पल्कियो भन्ने चेतका साथ यस्ता प्रवृत्तिको प्रतिवाद गर्नुपर्छ।”

बस्नेतको दाबी छ—आज एक राजनीतिक व्यक्तिमाथि अन्याय भए त्यसले भोलि समग्र राजनीतिक प्रणालीमाथि दबाब र आक्रमणको रूप लिन सक्छ।

यसअघि पौड्याल पक्राउबारे एमालेले संस्थागत रूपमा कुनै औपचारिक धारणा सार्वजनिक गरेको छैन। यस्तो अवस्थामा बस्नेतको प्रतिक्रिया पार्टीभित्रबाट आएको पहिलो खुला राजनीतिक सन्देशका रूपमा देखिएको छ।

तर, बस्नेतले उठाएको ‘राजनीतिक प्रतिशोध’को आरोप पुष्टि हुने वा नहुने विषय भने अनुसन्धानको प्रक्रिया, प्रमाण र सम्बन्धित निकायको आधिकारिक विवरणबाटै स्पष्ट हुनेछ।