दुग्ध विकास संस्थानका पूर्व प्रबन्ध निर्देशक शाह भ्रष्टाचारमा दोषी ठहर

काठमाण्डौ । सर्वोच्च अदालतले दुग्ध विकास संस्थानका तत्कालीन प्रबन्ध निर्देशक शत्रुघ्नप्रसाद साहलाई गैरकानूनी सम्पत्ति आर्जन गरी भ्रष्टाचार गरेको मुद्दामा दोषी ठहर गर्ने विशेष अदालतको फैसला सदर गरेको छ।

न्यायाधीश विनोद शर्मा र शान्तिसिंह थापाको संयुक्त इजलासले विशेष अदालतको निर्णयलाई सदर गर्दै साहविरुद्धको अभियोग कायम राखेको हो।

अख्तियार दुरुपयोग अनुसन्धान आयोगले २०७३ वैशाखमा साह र उनकी पत्नी शुसिला कुमारी साहविरुद्ध करिब २ करोड ३८ लाख रुपैयाँबराबरको गैरकानूनी सम्पत्ति आर्जन गरेको आरोपमा मुद्दा दायर गरेको थियो।

विशेष अदालतले २०७५ पुसमा साहलाई दोषी ठहर गर्दै ६८ लाख २४ हजार रुपैयाँ बराबरको गैरकानूनी सम्पत्ति आर्जन गरेको निष्कर्ष निकालेको थियो। अदालतले सोही अनुसार जरिवाना तथा ९ वर्ष कैद सजाय तोकेको थियो।

साह दुग्ध विकास संस्थानमा प्राविधिक अधिकृतदेखि प्रबन्धकसम्मका विभिन्न पदमा कार्यरत रहँदै आएका थिए। संस्थामा कार्यरत रहँदा उनले गरेको आम्दानी र सम्पत्तिबीच उल्लेखनीय असमानता देखिएको भन्दै अख्तियारले अस्वाभाविक सम्पत्ति आर्जन भएको दाबी गरेको थियो।