ह्यारी केनको दुई गोलमा इंग्ल्यान्ड अन्तिम १६ मा, कंगो पराजित

काठमाण्डौ । कप्तान ह्यारी केनले खेलको अन्तिम चरणमा गरेको दुई गोलको मद्दतमा इंग्ल्यान्डले फिफा विश्वकप २०२६ को नकआउट चरणमा डेमोक्रेटिक रिपब्लिक अफ कंगो (डीआर कंगो) माथि २–१ को पुनरागमन जित दर्ता गर्दै अन्तिम १६ मा स्थान सुरक्षित गरेको छ।

अमेरिकाको एटलान्टामा बुधबार सम्पन्न खेलमा डीआर कंगोले सातौं मिनेटमै ब्रायन सिपेङ्गाको गोलबाट अप्रत्याशित अग्रता लिएको थियो। सुरुआती गोलपछि इंग्ल्यान्डले लगातार आक्रमण गरे पनि डीआर कंगोका गोलरक्षक लियोनेल म्पासीको उत्कृष्ट प्रदर्शनका कारण पहिलो हाफभर बराबरी गोल गर्न सकेन।

दोस्रो हाफमा प्रशिक्षक थोमस टुचेलले आक्रामक परिवर्तन गर्दै एन्थोनी गोर्डनलाई मैदानमा उतारेपछि इंग्ल्यान्डको खेलमा नयाँ ऊर्जा देखिएको थियो। खेलको ७५औं मिनेटमा गोर्डनकै क्रसमा केनले हेडमार्फत बराबरी गोल गरे। त्यसपछि ८६औं मिनेटमा गोर्डनकै पासमा केनले शक्तिशाली प्रहार गर्दै विजयी गोल गरेका थिए।

यस जितसँगै इंग्ल्यान्डले अन्तिम १६ मा सह–आयोजक मेक्सिकोसँग प्रतिस्पर्धा गर्ने भएको छ। केनले यस प्रतियोगितामा आफ्नो गोल संख्या पाँच पुर्याउँदै गोल्डेन बुटको दौडलाई पनि थप रोचक बनाएका छन्।

खेलपछि इंग्ल्यान्डका प्रशिक्षक थोमस टुचेलले कठिन परिस्थितिमा पनि टोलीले विश्वास नहारेकै कारण पुनरागमन सम्भव भएको प्रतिक्रिया दिए। कप्तान केनले डीआर कंगोको प्रदर्शनको प्रशंसा गर्दै विशेषगरी गोलरक्षक म्पासीले उत्कृष्ट खेल प्रस्तुत गरेको बताए।

यद्यपि पराजित भए पनि ५२ वर्षपछि विश्वकपमा फर्किएको डीआर कंगोले प्रतियोगिताभर उत्कृष्ट प्रदर्शन गर्दै फुटबल समर्थकहरूको मन जित्न सफल भयो ।