पूँजीबजार रेस्क्यु गर्न सरकारलाई दबाब, लगानीकर्ताले मागे तत्काल सुधार योजना

काठमाण्डौ । पछिल्लो समय पूँजीबजारमा देखिएको अस्थिरता र लगानीकर्ताको घट्दो मनोबलप्रति चासो व्यक्त गर्दै सरकारले तत्काल सुधारका पहल गर्नुपर्ने माग उठेको छ।

लगानीकर्ताहरूले अर्थमन्त्रीसमक्ष पूँजी बजारलाई संकटबाट बाहिर ल्याउन सरकार, ब्रोकर, लगानीकर्ता र नियामक निकायबीच तत्काल खुला छलफल आयोजना गर्न आग्रह गरेका छन्।

बजारको वर्तमान अवस्थाको सूक्ष्म विश्लेषण गरी समस्या पहिचान गरेर दीर्घकालीन सुधारका योजना ल्याउनुपर्ने उनीहरूको माग छ।

नेपाल सेयरधनी संघका अध्यक्ष घनश्याम पाण्डेले पूँजी बजार सुधारका लागि स्पष्ट कार्ययोजना तयार गरी तत्काल कार्यान्वयन गर्न सरकार जिम्मेवार भएर अघि बढ्नुपर्ने माग गरेका छन्।

‘बजारमा देखिएको अनिश्चितता हटाउन र लगानीकर्ताको विश्वास पुनःस्थापित गर्न सरकारले सक्रिय भूमिका खेल्नुपर्छ’ उनले भने, ‘अहिलेको अवस्थामा आम लगानीकर्ताबीच विश्वासको वातावरण सिर्जना गर्दै सरकारले ठूला तथा संस्थागत लगानीकर्तालाई आकर्षित गर्ने नीति लिनुपर्छ ।’

पूँजी बजारलाई अर्थतन्त्रको महत्वपूर्ण आधारका रूपमा विकास गर्न नीतिगत सुधार, लगानीमैत्री वातावरण र नियामकीय सहजता आवश्यक रहेको उनको भनाइ छ।