नाइमा मोबिलिटी एक्स्पोमा बीवाईडीको तीन नयाँ मोडल, मूल्य ३०.७५ लाखदेखि ७८ लाखसम्म

काठमाण्डौ । बीवाईडीले नेपाली बजारमा एकैपटक तीन नयाँ मोडल सार्वजनिक गरेको छ ।  

नेपालका लागि बीवाईडीको आधिकारिक वितरक साइमेक्स इंकले आजदेखि सुरु भएको ‘नाइमा मोबिलिटी एक्स्पो’मार्फत एटो १ र एटो ३ का फेसलिफ्ट संस्करण तथा एटो २ को नयाँ बेस भेरियन्ट सार्वजनिक गरेको हो ।

तीन नयाँ मोडल बजारमा आएसँगै बीवाईडीले नेपाली बजारमा आफ्नो एटो सिरिजलाई थप विस्तार गरेको छ  । विशेषगरी ४५ किलोवाट आवर ब्याट्रीसहितको एटो २ को नयाँ बेस भेरियन्टले तुलनात्मक रूपमा कम मूल्यमा कम्प्याक्ट विद्युतीय एसयूभी खोज्ने ग्राहकलाई लक्षित गरेको कम्पनीले जनाएको छ ।

४५ किलोवाट आवर ब्याट्रीसहित एटो २

यसअघि नेपालमा एटो २ को ५१.१३ किलोवाट आवर ब्याट्री भएको भेरियन्ट मात्र उपलब्ध थियो । अब कम्पनीले ४५ किलोवाट आवर ब्याट्रीसहितको ‘एसेन्सियल’ बेस भेरियन्ट पनि नेपाली बजारमा ल्याएको छ ।

नयाँ एटो २ एसेन्सियलको मूल्य ४५ लाख ९५ हजार रुपैयाँ तोकिएको छ । त्यस्तै, एटो २ प्रिमियमको मूल्य ४८ लाख ९९ हजार रुपैयाँ कायम गरिएको छ ।

बीवाईडीले एटो २ लाई कम्प्याक्ट विद्युतीय एसयूभीका रूपमा बजारमा प्रस्तुत गर्दै आएको छ। नयाँ बेस भेरियन्ट थपिएसँगै ग्राहकले आफ्नो बजेट र आवश्यकताअनुसार एटो २ का विभिन्न विकल्पमध्ये छनोट गर्न सक्ने भएका छन् ।  

एटो ३ फेसलिफ्टमा डिजाइन र चार्जिङमा सुधार

बीवाईडीले नेपाली बजारमा लामो समयदेखि बिक्री हुँदै आएको एटो ३ को फेसलिफ्ट संस्करणसमेत सार्वजनिक गरेको छ । कम्पनीका अनुसार नयाँ एटो ३ मा बाहिरी डिजाइनसँगै प्रविधि र चार्जिङ प्रणालीमा समेत सुधार गरिएको छ ।

एटो ३ एडभान्स्डको मूल्य ६२ लाख ९० हजार रुपैयाँ तोकिएको छ भने सुपेरियर भेरियन्टको मूल्य ७८ लाख रुपैयाँ रहेको छ ।

नेपाली विद्युतीय सवारीसाधन बजारमा बीवाईडीको लोकप्रिय मोडलमध्ये रहेको एटो ३ को फेसलिफ्ट संस्करणमा डिजाइन तथा प्रविधिमा गरिएको सुधारले यसको प्रतिस्पर्धात्मक क्षमता थप बढाउने अपेक्षा गरिएको छ ।

नयाँ डिजाइनमा ‘एटो १ फेसलिफ्ट’ नेपालमा

बीवाईडीले आफ्नो सानो विद्युतीय ह्याचब्याक एटो १ को फेसलिफ्ट संस्करण पनि सार्वजनिक गरेको छ । सहरी आवतजावत तथा इन्ट्री लेभल विद्युतीय गाडीका रूपमा लक्षित एटो १ को नयाँ संस्करणमा डिजाइन र फिचरमा परिमार्जन गरिएको कम्पनीले जनाएको छ ।

एटो १ फेसलिफ्टको डायनामिक भेरियन्टको मूल्य ३० लाख ७५ हजार रुपैयाँ तोकिएको छ भने प्रिमियम भेरियन्टको मूल्य ३४ लाख ८० हजार रुपैयाँ रहेको छ ।

नेपालमा उपलब्ध एटो १ को डायनामिक भेरियन्टमा ३०.०८ किलोवाट आवर ब्याट्री प्रयोग गरिएको छ । यसले एकपटकको चार्जमा करिब २३० किलोमिटर रेन्ज दिने कम्नपीले जनाएको छ ।

फेसलिफ्ट संस्करणमा वायरलेस चार्जर र ३६० डिग्री क्यामरालगायतका थप फिचर समावेश गरिएको कम्पनीले जनाएको छ। नयाँ सुविधा तथा प्रविधिले सहरी क्षेत्रमा दैनिक प्रयोगका लागि एटो १ लाई थप सहज र सुविधाजनक बनाउने कम्पनीको अपेक्षा छ ।