नेपालमा BAIC BJ30e हाइब्रिड SUV सार्वजनिक, सुरुवाती मूल्य कति ?

काठमाडौं: BAIC ले NAIMA Mobility Expo 2026 मार्फत नेपाली बजारमा आफ्नो नयाँ BJ30e हाइब्रिड SUV सार्वजनिक गरेको छ। Laxmi Motorhub Pvt. Ltd. ले नेपालमा ल्याएको BJ30e को परिचयात्मक मूल्य १ करोड १९ लाख ९६ हजार रुपैयाँबाट सुरु हुने कम्पनीले जनाएको छ।

BAIC BJ30e मा १.५T हाइब्रिड पावरट्रेन, डुअल-स्पिड DHT र इलेक्ट्रिक 4WD प्रणाली रहेको छ। यसले अधिकतम ३०१ kW पावर र ६८५ Nm टर्क उत्पादन गर्छ भने यसको संयुक्त रेन्ज १,००० किलोमिटरभन्दा बढी रहेको दाबी गरिएको छ। यसले नेपालमा लामो दूरीको यात्रा गर्ने ग्राहकका लागि रेन्ज र इन्धन दक्षताको हिसाबले उपयोगी विकल्प बन्न सक्ने देखिन्छ।

नेपालका विविध सडक तथा भौगोलिक अवस्थालाई ध्यानमा राख्दा BJ30e को २१५ mm ग्राउन्ड क्लियरेन्स, २५ डिग्री एप्रोच एंगल, ३० डिग्री डिपार्चर एंगल र ६०० mm सम्मको वाटर वेडिङ क्षमता यसको प्रमुख विशेषता हुन्। यसमा Snow, Sand, Mud र Wading गरी विभिन्न भू–भागका लागि चार ड्राइभिङ मोड तथा इलेक्ट्रिक 4WD र Hill Descent Control समेत उपलब्ध छन्।

BJ30e को लम्बाइ ४,७३० mm, चौडाइ १,९१० mm र उचाइ १,७९० mm रहेको छ भने ह्वीलबेस २,८२० mm छ। हाइब्रिड प्रणालीले इलेक्ट्रिक, सिरिज र प्यारेलेल मोडमा काम गर्न सक्ने भएकाले यो SUV लाई सहरी आवतजावतदेखि हाइवे तथा आउटडोर यात्रासम्म प्रयोग गर्न सकिने गरी डिजाइन गरिएको छ।

सुरक्षातर्फ BJ30e मा Adaptive Cruise Control, Automatic Emergency Braking, Forward Collision Warning, Lane Keeping Assist र Blind Spot Detection जस्ता एडभान्स्ड ड्राइभर असिस्टेन्स सिस्टम उपलब्ध छन्। यसमा १,४९६ लिटरसम्मको बुट स्पेस र फ्ल्याट फोल्ड गर्न मिल्ने रियर सिट पनि रहेको छ। हाइब्रिड दक्षता, लामो रेन्ज, उच्च ग्राउन्ड क्लियरेन्स र अफ–रोड क्षमताको संयोजनसहित BJ30e लाई नेपालको सहरदेखि पहाडी तथा साहसिक यात्रासम्मका लागि लक्षित SUV का रूपमा प्रस्तुत गरिएको छ।