सुनको मूल्य हालसम्मकै उच्च, तोलाकै झण्डै डेढ लाख

Gold
शुक्रबार, श्रावण १८,२०८१ 10:44:18

काठमाण्डौ । घरेलु बजारमा सुनको मूल्य हालसम्मकै उच्च कायम भएको छ । अघिल्लो दिन प्रतितोला १६ सय रुपैयाँले बढेको सुनको मूल्य आज पनि बढेको हो।

नेपाल सुनचाँदी व्यवसायी महासंघका अनुसार आज छापावाला सुनको मूल्य ५ सय रुपैयाँले बढ्दै प्रतितोला १ लाख ४९ हजार ९ सय रुपैयाँ कायम भएको छ । यो मूल्य हालसम्मकै उच्च हो । अघिल्लो दिन छापावाला सुनको मूल्य १ लाख ४९ हजार ४ सय रुपैयाँमा कारोबार भएको थियो ।

यसअघि गत साउन २ गते सुनको मूल्य हालसम्मकै उच्च कायम भएको थियो । त्यसदिन छापावाला सुनको मूल्य २ हजार रुपैयाँले बढ्दै प्रतितोला १ लाख ४९ हजार ८ सय रुपैयाँ कायम भएको थियो ।

त्यस्तै आज तेजावी सुनको मूल्य पनि ५ सय रुपैयाँले बढ्दै प्रतितोला १ लाख ४९ हजार २ सय रुपैयाँ कायम भएको छ । अघिल्लो दिन तेजावी सुनको मूल्य प्रतितोला १ लाख ४८ हजार ७ सय रुपैयाँ कायम थियो ।

आज चाँदीको मूल्य भने घटेको छ । चाँदीको मूल्य ५ रुपैयाँले घट्दै प्रतितोला १ हजार ७९५ रुपैयाँमा कारोबार भईरहेको छ ।