साढे १ अर्बको आइपीओ ल्याउँदै लघुबीमा कम्पनी, व्यवसाय कुनको कति ?

काठमाण्डौ । आइपीओ निष्कासनको तयारीमा रहेका लघुबीमा कम्पनीहरुले ८ करोड रुपैयाँ बीमा शुल्क संकलन गरेका छन् । नेपाल बीमा प्राधिकरणका अनुसार चालु आर्थिक वर्षको साउन महिनामा ३ लघु जीवन बीमा र ४ लघु निर्जीवन बीमा कम्पनी गरी ७ वटा लघुबीमकले ८ करोड ८६ लाख रुपैयाँ प्रिमियम संकलन गरेका हुन् ।  

लघु जीवन बीमातर्फ ३ करोड ७० लाख रुपैयाँ प्रिमियिम संकलन भएको छ भने निर्जीवनतर्फ ५ करोड १६ लाख रुपैयाँ प्रिमियम संकलन भएको छ ।  

लघु जीवन बीमातर्फ सर्वाधिक गार्डियन माइक्रो लाइफले बीमाशुल्क संकलन गरेको छ । कम्पनीले १ करोड ८८ लाख रुपैयाँ प्रिमियम कलेक्सन गरेको छ । कम्पनीमा हाल जारी बीमालेख संख्या २ लाख २७ हजार ४६१ रहेको छ ।  

त्यस्तै, दोस्रोमा क्रेष्ट माइक्रो लाइफले १ करोड २९ लाख रुपैयाँ बीमाशुल्क आर्जन गरेको छ । कम्पनीमा हाल जारी बीमालेख संख्या ६ हजार ८९३ रहेको छ । यसका साथै लिवर्टी माइक्रो लाइफले भने साउन महिनामा जम्मा ५१ लाख रुपैयाँ मात्रै बीमा शुल्क आर्जन गरेको छ । कम्पनीमा जारी बीमालेख संख्या ७ हजार ६४३ रहेको छ ।  

यता निर्जीवनतर्फ भने सर्वाधिक नेपाल माइक्रो इन्स्योरेन्सले प्रिमियम भित्र्याएको छ । कम्पनीले १ करोड ३८ लाख रुपैयाँ बीमाशुल्क संकलन गरेर अग्रस्थान कायम गरेको छ । कम्पनीमा जारी बीमालेख संख्या ५ हजार ७८१ रहेको छ ।  

त्यस्तै, प्रोटेक्टिभ माइक्रो इन्स्योरेन्सले १ करोड ३६ लाख, ट्रस्ट माइक्रो इन्स्योरेन्सले १ करोड २२ लख रुपैयाँ र स्टार माइक्रो इन्स्योरेन्सले १ करोड १८ लाख रुपैयाँ बीमाशुल्क संकलन गरेको छ । यी कम्पनीहरुमा जारी बीमालेख संख्या क्रमशः ४ हजार ६३९, ४ हजार ३६१ र ५ हजार ४६२ रहेको छ ।  

साढे १ अर्ब रुपैयाँको आईपीओ आउँदै  

लघुबीमा निर्देशिका अनुसार सञ्चालनमा रहेका ७ वटा लघुबीमा कम्पनीले साढे १ अर्ब रुपैयाँ बराबरको आईपीओ निष्कासन गर्नुपर्नेछ । लघुबीमा कम्पनीहरुले कायम चुक्तापुँजीको ३० प्रतिशत सेयर सर्वसाधारणका लागि जारी गर्नुपर्ने निर्देशिकामा उल्लेख छ ।  

हाल लघुबीमा कम्पनीहरुको चुक्तापुँजी ७५ करोड रुपैयाँ छ । यसर्थमा सबै कम्पनीले २२ करोड ५० लाख रुपैयाँ बराबरको आइपीओ जारी गर्दा कुल १ अर्ब ५७ करोड ५० लाख रुपैयाँ बराबरको आइपीओ निष्कासन हुनेछ ।  

लघुबीमा कम्पनीहरुले आइपीओ निष्कासनको प्रक्रिया समेत अघि बढाइसकेका छन् । कम्पनीहरुले साधारणसभामार्फत आइपीओ निष्कासनको प्रस्ताव पारित गरिसकेका छन् भने केही कम्पनीले बिक्री प्रबन्धक तथा प्रत्याभूतिकर्ता समेत नियुक्ति गरिसकेका छन् ।

लघुबीमा निर्देशिका बमोजिम लघुबीमकहरुले आइपीओ जारी गर्नुपर्ने व्यवस्था भएपनि कम्पनीहरुको व्यवसाय बढेपछि मात्रै सर्वसाधारणलाई सेयर जारी गर्ने लघुबीमा कम्पनीका सीइओहरु बताउँछन् ।