आईफोन १६ को माग अपेक्षा गरेभन्दा कम, बिक्री १३% ले घट्यो

काठमाण्डौ । अमेरिका लगायतका विश्वका अन्य देशहरुमा प्रि–अर्डर बुकिङ खुलेसँगै आईफोन १६ को माग अपेक्षा गरेभन्दा कम देखिएको छ । ब्लग पोष्ट मिङ–ची कुओका अनुसार प्रि–बुकिङ सुरु भएयता आईफोन १६ का सबै ४ वटा मोडलका लागि पहिलो साता अनुमानित ३ करोड ७० लाख युनिट बिक्री भएको छ । जुन गत वर्ष लञ्च भएको आईफोन १५ को पहिलो साताको तुलनामा करिब १३ प्रतिशतले कम हो ।  

आईफोन १६ का प्रो मोडलहरुको मागमा आएको कमीका कारण समग्र आईफोन १६ सिरिजको मागमा कमी आएको जनाइएको छ । प्रि–अर्डर बुकिङ भएको पहिलो साता आईफोन १६ प्रो को बिक्री २७ प्रतिशत र आईफोन १६ प्रो म्याक्सको बिक्री १६ प्रतिशतले घटेको छ ।  

कम्पनीले पहिलो साता ९८ लाख युनिट आईफोन प्रो र १ करोड ७१ लाख युनिट आईफोन प्रो म्याक्स बिक्री गरेको छ ।  

कुओले पहिलो साता ४ करोड आईफोन १६ मोडल बिक्री हुने अपेक्षा गरेको थियो ।  

लामो समयदेखि बिक्रीमा आईरहेको कमीका कारण आईफोन १६ मोडलको बिक्रीमा उछाल आउनु पर्ने थियो । तर नयाँ सिरिजहरुमा ठूला परिवर्तन नपाउँदा ग्राहकहरुको आईफोनप्रतिको आकर्षण बढेको देखिदैन । आईफोन १२ मा फाइभ जी मा अपग्रेड भएयता कुनै पनि ठूलो अपग्रेड भएको छैन । आईफोन १६ मा गरिएको एआई अपग्रेडले यसको बिक्रीमा उछाल आउने अपेक्षा गरिएको थियो ।  

ग्राहकहरुको आकर्षण प्रो र प्रो म्याक्सको तुलनामा सस्तो पर्ने आईफोन १६ र १६ प्लसमा देखिएकाले यसले कम्पनीको औषत बिक्री मूल्य र समग्र आईफोन बिक्री आम्दानीमा पर्ने जनाइएको छ ।