सुधारको बाटोमा एनएमबी लघुवित्तको वित्तीय अवस्था, खुद नाफा र आम्दानीलगायतका सूचकमा सुधार

काठमाण्डौ । एनएमबी लघुवित्त वित्तीय संस्था लिमिटेडले आफ्नो वित्तीय अवस्थामा उल्लेख्य सुधार गरेको छ । कम्पनीले सार्वजनिक गरेको चालु आवको पहिलो त्रैमासको वित्तीय विवरणअनुसार कम्पनीले अधिकांश सूचकमा सुधार गरेको देखिएको हो ।  

कम्पनीले यो अवधिमा आम्दानी बढाएर घाटाबाट उम्कदै नाफा आर्जन गर्नुका साथै खराब कर्जा अनुपात पनि घटाएको छ । कम्पनीले यो अवधिमा ८ करोड ८ लाख रुपैयाँबराबरको खुद ब्याज आम्दानी गरेको छ । यो रकम अघिल्लो आवको सोही अवधिको तुलनामा ४०.८६ प्रतिशतले बढी हो । अघिल्लो आवको पहिलो त्रैमाससम्म कम्पनीले ५ करोड ७४ लाख रुपैयाँबराबरको.खुद ब्याज आम्दानी गरेको थियो ।

यो अवधिमा कम्पनीले ९९ लाख ७७ हजार रुपैयाँबराबरको शुल्क तथा कमिशन आम्दानी गरेको छ ।  

कम्पनीले सेयर प्रिमियम शीर्षकमा ७ करोड २९ लाख रुपैयाँ छ्ट्टाएको छ । रिटेन्ड अर्निङ ५ करोड ५० लाख रुपैयाँले ऋणात्मक रहेको कम्पनीको रिजर्भको आकार २० करोड २ लाख रुपैयाँ रहेको छ । पहिलो त्रैमाससम्म कम्पनीले ग्राहकहरुबाट १ अर्ब ३० करोड रुपैयाँबराबरको निक्षेप संकलन गरेको छ । यस्तै कम्पनीले यो अवधिमा ५ अर्ब ४९ करोड रुपैयाँबराबरको कर्जा प्रवाह गरेको छ । 

यस्तै कम्पनीको वितरणयोग्य मुनाफा ४८ लाख ४ हजार रुपैयाँ रहेको छ । 

अघिल्लो आवमा ७.२७ प्रतिशत रहेको कम्पनीको खराब कर्जा अनुपात घटेर ६.३७ प्रतिशतमा सीमित बनेको छ ।  

समीक्षा अवधिसम्म कम्पनीको प्रतिसेयर आम्दानी(ईपीएस) ३.९७ रुपैयाँ, प्रतिसेयर नेटवर्थ १३०.२४ रुपैयाँ, प्रतिसेयर कुल सम्पत्तिको मूल्य ८०७.४९ रुपैयाँ र तरलता अनुपात १०.९७ प्रतिशत कायम भएको छ ।