आईपीओ निष्कासनको प्रस्ताव पारित गर्न भूगर्भ सिमेन्टले डाक्यो साधारण सभा

काठमाण्डौ । भुगर्भ सिमेन्टले आईपीओ निष्कासनको प्रस्ताव पारित गर्न साधारण सभा डाकेको छ । पुस ५ गते बसेको कम्पनीको सञ्चालक समितिको बैठकले साधारण सभा आह्वान गरेको हो ।  

उक्त सभा पुस २८ गते आइतबारका दिन काठमाण्डौमा रहेको कम्पनीको रजिष्टर्ड कार्यालयमा बिहान १० बजेदेखि सुरु हुनेछ । सभामा नियमनकारी निकायबाट अनुमति लिई सम्पूर्ण कानूनी प्रक्रिया पुरा गर्दै सर्वसाधारणमा आईपीओ जारी गर्ने विशेष प्रस्ताव पारित गरिनेछ ।

यस्तै गत आवको वार्षिक प्रतिवेदनका साथै वित्तीय विवरणहरु समेत पारित गरिनेछ । कम्पनीले वैदेशिक रोजगारीमा रहेका नेपाली, कम्पनीका कर्मचारी र सामुहिक लगानी कोष समेतमा जारी पूँजीको २० प्रतिशतका दरले आईपीओ निष्कासनको तयारी गरेको छ । यसका लागि कम्पनीले नबिल इन्भेष्टमेन्ट बैंकिङ लिमिटेडलाई निष्काशन तथा बिक्री प्रबन्धकमा नियुक्त गरिसकेको छ ।  

यो कम्पनी, कम्पनी रजिष्ट्रारको कार्यालयमा २०७३ मंसिर १५ गते प्रालिको रुपमा विधिवत दर्ता गई २०८० असार ७ गते पब्लिक कम्पनीका रुपमा परिणत भएको थियो । कम्पनीले कपिलवस्तु जिल्ला शिवराज नगरपालिका–०६,मा सिमेन्ट कारखाना तथा नरपानीरखाँचीकोट, अर्घाखाँची जिल्लामा खानी सञ्चालन गर्दै आएको छ ।

यस कम्पनीले ओपिसी (भुगर्भ सिमेन्ट) तथा पिपिसी (अपोलो, क्रिस्टल, देउराली) सिमेन्ट उत्पादन गर्ने कार्य गर्दै आएको छ । यस कम्पनीको वार्षिक उत्पादन क्षमता ६० हजार मेट्रिक टन ओपिसी सिमेन्ट तथा १ लाख ५० हजार मेट्रिक टन पिपिसी सिमेन्ट रहेको छ । यस कम्पनीको बजार क्षेत्र लुम्बिनी प्रदेश, गण्डकी प्रदेश, कर्णाली प्रदेश, सुदूरपश्चिम प्रदेश र काठमाण्डौं उपत्यकामा रहेको छ ।