महिन्द्राको XUV400 EV मा देखिए ६ गम्भीर समस्या, ब्याट्रीदेखि ब्रेकसम्म गुणस्तरहीन !

काठमाण्डौ । महिन्द्रा कम्पनीले जोडजाड गरी बनाएका गाडीहरुलाई 'इभी' भनेर नेपालमा निर्वाध बिक्री गरिरहेको छ । नेपालका लागि महिन्द्रा गाडीको आधिकारिक बिक्रेता अग्नी इन्कर्पोरेटेड(अग्नी ग्रुप)ले नेपालमा महिन्द्राका इभी एसयूभीहरु बिक्री गरिरहेको छ । तर, उसका इभी खरीद गर्ने ग्राहकहरुले भने निकै गम्भीर समस्या भोगिरहेका छन् ।  

पछिल्लो समय निकै तामझामका साथ नेपालमा लञ्च गरिएको XUV400 EV मा केही गम्भीर खालका समस्याहरु नै देखिएका प्रयोगकर्ताहरुको दाबी छ । प्रयोगकर्ताहरुकै अनुभवलाई समेटेर हामीले महिन्द्राको सो भेरिएन्ट किन प्रयोगका लागि उपयुक्त छैन वा यस्ता प्रडक्टमा लगानी गर्नु किन उचित छैन भन्ने विषयमा बुँदागत रुपमा प्रष्ट पार्ने कोशिश गरेका छौं । 

डिजाइन र भित्री भागको गुणस्तरमा प्रश्न

महिन्द्राले सुरुवाती समयमा धेरैको ध्यान खिचेको थयो । तर, प्रयोगकर्ताहरू र समीक्षकहरूले केही गम्भीर समस्याहरू औंल्याएका छन् । यो एसयूभीको डिजाइन पुरानो XUV300 सँग धेरै नै मेल खान्छ, जसका कारण यो इभी लिनेहरुलाई नयाँपनको कुनै अनुभव नै हुँदैन । यसको भित्री भागमा प्रयोग गरिएका सामग्रीहरूको गुणस्तरलाई लिएर आलोचना गरिएको छ । विशेषगरी केही प्लास्टिक कम्पोनेन्टहरू निकै नै कमजोर महसुस गरिएको प्रयोगकर्ताहरुले गुनासो गरिरहेका छन् ।  

विशेषताहरूको अभाव

बजारमा आफ्नो स्थान हुँदाहुँदै पनि, XUV 400 EV मा केही महत्वपूर्ण सुविधाहरू छैनन्, जस्तै वायरलेस चार्जिङ, यूएसबी टाइप सी पोर्ट, पावर एड्जस्टेबल अगाडिका सिटहरू, हिटेड साइड मिररहरू, इलेक्ट्रिक पार्किङ ब्रेक, र पछाडिको एसी भेन्टहरू। यी सुविधाहरूको अभावले समग्र आराम र सुविधा प्रभावित हुन सक्छ।

ब्याट्री प्रविधिको उस्तै चिन्ता

यो गाडीमा LG Chem को NMC532 ब्याट्री सेलहरू प्रयोग गरिएको छ, जुन नयाँ प्रविधिको तुलनामा पुरानो प्रविधिमा आधारित छ। यसले गाडीको कार्यक्षमता र दीर्घकालीन प्रदर्शनमा असर पार्नसक्छ । 

गाडी धेरै चाँडो बिग्रिने समस्या

केही गाडी मालिकहरूले किनेर केही समयपछि नै गाडी बिग्रने समस्या आएको रिपोर्ट गरेका छन्, जसले बारम्बार मर्मत सेवा आवश्यक पारेको छ। यी घटनाहरूका कारण महिन्द्राविरुद्ध सार्वजनिक रुपमै विरोधका आवाजहरु बाक्लिन थालेका छन् । भारतका केही प्रान्तमा त महिन्द्राले इभीको नाममा गुणस्तरहीन कार बजारमा ल्याएर ठगी गरेको र ग्राहकको पैसा स्वाहा बनाएको भन्दै कानूनी कारबाहीको प्रक्रियामै प्रयोगकर्ताहरु पुगेका त्यहाँका सञ्चारमाध्यमहरुले दाबी गरेका छन् ।  

ब्रेकको संवेदनशीलता

प्रयोगकर्ताहरूले ब्रेकिङ सिस्टमले अत्यधिक तीव्र प्रतिक्रिया दिने गरेको पाएका छन्, जसमा क्रमिक नियन्त्रणको अभाव देखिन्छ। यसको अर्थ यो गाडी गुडाइरहँदा जुनसुकै बेला ब्रेकमा समस्या आउनेदेखि ब्रेक फेल हुनेसम्मको दुर्घटना हुनसक्छ । यसप्रति प्रयोगकर्ताहरुमा त्रास देखिएको छ । यसले ड्राइभिङको सहजता र नियन्त्रणमा निकै ठूलो असर पारेको रिपोर्टहरुमा बताइएको छ ।  

पीडा दिने पछाडिको सिट

पछाडिको सिटमा पर्याप्त अन्डर थाइ समर्थन नहुँदा लामो यात्रामा यात्रुहरूको आराम प्रभावित हुनसक्छ। मिडिया रिपोर्टहरुका अनुसार यो गाडीको पछाडि बसेर लामो यात्रा गर्नु तनावपूर्ण र पीडादायी हुनसक्छ ।

नेपालमा यो इभी एसयूभीको मूल्य ५२ लाख राखिएको छ ।

यसअघि प्रकाशित सम्बन्धित समाचार:

• एक्सपर्टिजबिना उत्पादित महिन्द्राका इभी एसयूभीको कन्तबिजोग, मार्केटमा टिक्नै धौ धौ