आईपीएलको उपाधि जितेको आरसीबीले कति पायो पुरस्कार ?

काठमाण्डौ । विश्वकै चर्चित क्रिकेट लिग इण्डियन प्रिमियर लिग(आईपीएल) २०२६ को रोमाञ्चक फाइनलमा रोयल च्यालेन्जर्स बेङ्ग्लोर(आरसीबी)ले गुजरात टाइटन्सलाई पराजित गर्दै लगातार दोस्रो पटक उपाधि आफ्नो नाम गर्न सफल भएको छ। अहमदाबादस्थित नरेन्द्र मोदी स्टेडियममा सम्पन्न फाइनलमा उत्कृष्ट प्रदर्शन गर्दै आरसीबीले उपाधि रक्षा गरेको हो।

यस जितसँगै आरसीबीले दोस्रो आईपीएल ट्रफी जित्दै लिगको सबैभन्दा सफल फ्रेन्चाइजमध्ये आफूलाई अझ मजबुत रूपमा स्थापित गरेको छ। गुजरात टाइटनले दिएको १५५ रनको लक्ष्य आरसीबीले ५ विकेट गुमाउँदै भेट्टायो । यसरी आरसीबीले १२ बल बाँकी छदै ५ विकेटले जित हात पार्यो । 

भारतीय क्रिकेट नियन्त्रण बोर्ड(बीसीसीआई) ले आईपीएल २०२६ सिजनका लागि ४६.५ करोड भारुभन्दा बढीको कुल पुरस्कार कोष छुट्याएको थियो। यस अन्तर्गत विजेता आरसीबीले २० करोड भारुको पुरस्कार प्राप्त गरेको छ भने उपविजेता गुजरात टाइटन्सले १३ करोड भारु हात पारेको छ। फाइनलसम्म पुग्न सफल अन्य टोलीहरूलाई पनि पुरस्कार रकम प्रदान गरिएको छ, जसमा राजस्थान रोयल्सले तेस्रो स्थानका लागि ७ करोड र सनराइजर्स हैदराबादले चौथो स्थानका लागि ६.५ करोड भारु प्राप्त गरेका छन्।

आईपीएलको सुरुवाती वर्षदेखि पुरस्कार राशिमा उल्लेखनीय वृद्धि भएको छ। २००८ मा विजेता टोलीले करिब ४.८ करोड भारु प्राप्त गर्थे भने हाल त्यो रकम बढेर २० करोड भारु पुगेको छ।

आईपीएल नियमअनुसार, पुरस्कार रकमको वितरण खेलाडी र फ्रेन्चाइजबीच बराबरी रूपमा गरिन्छ। सामान्यतया ५० प्रतिशत रकम खेलाडी तथा सपोर्ट स्टाफलाई र बाँकी ५० प्रतिशत फ्रेन्चाइज व्यवस्थापनलाई दिइन्छ, जसले सम्पूर्ण टोलीलाई सफलताबाट लाभान्वित बनाउँछ।

व्यक्तिगत अवार्डहरू पनि प्रतियोगितामा थप आकर्षणका रूपमा रहने गरेका छन् । जसमा ओरेन्ज क्याप, पर्पल क्याप र मोस्ट भ्यालुएबल प्लेयर जस्ता सम्मानहरूका साथ नगद पुरस्कार पनि प्रदान गरिन्छ, जसको कुल मूल्य करिब १ करोड भारुसम्म पुग्ने बताइएको छ।