(2).gif)
.jpg)
.png)
काठमाण्डौ । अमेरिकी राष्ट्रपति डोनाल्ड ट्रम्पले इरानले स्ट्रेट अफ हर्मुज पार गर्ने जहाजहरूबाट कुनै प्रकारको टोल, बीमा शुल्क वा अन्य कुनै पनि प्रकारको शुल्क नलिने प्रतिवद्धता जाहेर गरेको बताएका छन् ।
ट्रम्पले आफ्नो सामाजिक सञ्जाल ट्रुथ सोसलमा लेख्दै भने, ‘अमेरिकाले इरानलाई कुनै पैसा दिएको छैन, न त कुनै पैसा उनीहरूको नियन्त्रणमा गएको छ। हामी उनीहरूको केही रकम जारी गर्नेछौं, जुन पूर्ण रूपमा हाम्रो नियन्त्रणमा छ, र त्यो रकम हाम्रो किसान र पशुपालकहरूका लागि मकै, गहुँ, भटमास लगायतका कृषि उत्पादन खरिद गर्न प्रयोग गरिनेछ।’
उनले इरानमा खाद्यान्नको आवश्यकता अत्यधिक रहेको र उक्त खाद्यान्न केवल अमेरिकाबाट मात्र खरिद गरिने समेत बताए।
यी टिप्पणीहरू यस्तो समयमा आएका हुन् जब अमेरिका र इरानबीच अस्थायी शान्ति सम्झौता भएको केही दिन मात्र भएको छ। उक्त सम्झौताअनुसार दुवै पक्षले १४ बुँदे समझदारीपत्र अन्तर्गत स्ट्रेट अफ हर्मुज कम्तीमा ६० दिनका लागि शुल्करहित रूपमा पुनः सञ्चालन गर्ने र सबै प्रकारका सैन्य तनाव अन्त्य गर्ने सहमति गरेका छन्।
सम्झौताले लेबनानमा इजरायल र इरान समर्थित हिज्बुल्लाहबीच जारी तनाव पनि नियन्त्रण गर्ने लक्ष्य राखेको बताइएको छ। यद्यपि, सम्झौताको कार्यान्वयन र केही प्राविधिक बुँदाहरूलाई लिएर वाशिङ्टन र तेहरानबीच अझै मतभेद जारी रहेको जनाइएको छ।
स्ट्रेट अफ हर्मुज विश्व तेल आपूर्तिको करिब २० प्रतिशत हिस्सा बोक्ने अत्यन्त संवेदनशील समुद्री मार्ग भएकाले यस क्षेत्रमा कुनै पनि परिवर्तनले विश्व ऊर्जा बजारमा ठूलो प्रभाव पार्न सक्छ।
.png)
.jpg)
.jpg)
