लगातार वर्षापछि नेपालगन्जका बजार र बस्ती जलमग्न, न्यूरोड, सेतु विक चोकसहितका क्षेत्र पानीले भरिए

काठमाण्डौ । लगातार परेको वर्षाका कारण नाला तथा ढल निकास प्रणाली अवरुद्ध हुँदा नेपालगन्जका विभिन्न बजार र बस्ती क्षेत्रहरू जलमग्न भएका छन्।  

ढल र नालाहरू नियमित रूपमा सफाइ नहुँदा फोहोर जम्मा भई पानीको निकास बन्द भएपछि पहिलो वर्षामै डुबानको समस्या देखिएको स्थानीयवासीले बताएका छन्।

मंगलबार बिहान करिब ५ बजेदेखि शुरु भएको वर्षा दिउँसोसम्म निरन्तर परेपछि न्यूरोड, सेतु विक चोक, त्रिवेणी मोड, गणेशपुर, बसपार्क, धम्बोझी, एकलैनी, बिलासपुर, कोरियनपुर र भृकुटीनगरलगायतका क्षेत्रमा पानी जमेको छ।  

सडकदेखि घरआँगनसम्म पानी पस्दा स्थानीयको दैनिक जीवन प्रभावित बनेको छ।

स्थानीयका अनुसार नगर क्षेत्रमा ढल तथा नाला निर्माण भए पनि तिनको नियमित सरसफाइ र मर्मतमा ध्यान नदिँदा प्रत्येक वर्ष सामान्य वर्षामै डुबानको समस्या दोहोरिने गरेको छ।  

नालामा थुप्रिएको फोहोरले निकास रोकिँदा पानी बस्तीभित्र पस्ने अवस्था बनेको उनीहरूको भनाइ छ।

व्यवसायीहरूले पसलभित्र पानी पसेर सामानमा क्षति पुगेको बताएका छन्।  

साथै, जलमग्न सडकका कारण आवागमनसमेत प्रभावित हुँदा सर्वसाधारणलाई आवतजावतमा कठिनाइ भएको छ।

स्थानीयहरूले नगरपालिकालाई ढल तथा नाला व्यवस्थापनमा तत्काल सुधार गर्न आग्रह गरेका छन्।