विश्व संकटको डरबीच स्विट्जरल्यान्डमा अर्बपतिका लागि पहाडभित्र सुरक्षित संसार, सुनदेखि फेरारीसम्म सुरक्षित राख्न सकिने

काठमाण्डौ । विश्वभर बढ्दो भूराजनीतिक तनाव, वातावरणीय संकट र सम्भावित विपदबीच अति धनाढ्य व्यक्तिका लागि स्विट्जरल्यान्डमा पहाडभित्र अत्याधुनिक भूमिगत सुरक्षा केन्द्र निर्माण भइरहेको छ।

स्विट्जरल्यान्डको ब्रुनिग मासिफ क्षेत्रमा रहेको लुंगर्न गाउँनजिकै चूनढुंगाको पहाडभित्र बुरीनिक मेगा सेभ नामक भूमिगत संरचना निर्माण भइरहेको हो। परियोजनालाई महँगा सम्पत्ति भण्डारण गर्ने सुरक्षित स्थानसँगै सम्भावित विश्वव्यापी संकटका बेला आश्रय लिन सकिने निजी बंकरका रूपमा विकास गरिँदैछ।

परियोजनासम्बन्धी विवरणअनुसार पहिलो चरणका भूमिगत कक्षहरूको उत्खनन सन् २०२६ को सुरुवातदेखि सुरु भएको हो। प्रारम्भिक ग्राहकका रूपमा उच्च सम्पत्ति भएका व्यक्तिहरू निश्चित भएपछि निर्माण अघि बढाइएको बताइएको छ।

पहिलो चरणका संरचना निर्माण गर्न करिब दुई वर्ष लाग्ने अनुमान गरिएको छ। भूमिगत संरचना जमिनको सतहबाट १०० मिटरभन्दा बढी गहिराइमा निर्माण गरिँदैछ। यहाँ करिब दुई दर्जन विशेष रूपमा डिजाइन गरिएका कक्ष रहनेछन्।

यसको प्रवेश शुल्क करिब ५ लाख स्विस फ्र्याङ्कबाट सुरु हुने बताइएको छ। नेपाली रुपैयाँमा यो रकम विनिमय दरअनुसार करोडौं रुपैयाँ बराबर हुन्छ। यी कक्षमा बहुमूल्य कला, दुर्लभ मदिरा, पुराना लक्जरी कार, सुन तथा अन्य बहुमूल्य धातुजस्ता सम्पत्ति सुरक्षित राख्न सकिनेछ।

भूमिगत कक्षको प्राकृतिक तापक्रम करिब १३ डिग्री सेल्सियस कायम रहने डिजाइन गरिएको छ, जसले विशेष गरी कला तथा दुर्लभ वाइनजस्ता वस्तुको दीर्घकालीन भण्डारणमा सहयोग गर्ने बताइएको छ।

परियोजनाको अवधारणा अहिले केवल बहुमूल्य वस्तु सुरक्षित राख्ने भण्डारण केन्द्रमा सीमित छैन। विकासकर्ताहरूले आवश्यक पर्दा मानिस बस्न सक्ने मोड्युलर आवासीय संरचना समेत तयार गर्ने योजना बनाएका छन्।

यी संरचनालाई निजी बैठक कक्ष, बोर्डरुम, संकटका बेला प्रयोग हुने सुरक्षित कोठा वा अस्थायी आवासका रूपमा प्रयोग गर्न सकिनेछ।

बहुस्तरीय सुरक्षा जाँच पार गरेपछि मात्र प्रवेश गर्न सकिने यस परिसरलाई सतहमा उत्पन्न हुन सक्ने सम्भावित संकटबाट जोगिने सुरक्षित स्थलका रूपमा विकास गरिँदैछ।

यसै परिसरमा बुरीनिक इन्स्टीच्युट समेत रहनेछ, जहाँ रणनीतिक सुरक्षा, संकट व्यवस्थापन तथा सुरक्षा तालिमसम्बन्धी गतिविधि सञ्चालन हुने बताइएको छ।

पहाडभित्र सैन्य संरचना र बंकर निर्माण गर्नु स्विट्जरल्यान्डका लागि नयाँ विषय भने होइन। विगत एक शताब्दीभन्दा बढी समयदेखि स्विट्जरल्यान्डले सम्भावित युद्ध र संकटबाट नागरिक तथा सैन्य संरचना जोगाउन पहाडभित्र गोप्य किल्ला, हतियार भण्डार र भूमिगत आश्रयस्थल निर्माण गर्दै आएको छ।

यो सर्वसाधारणका लागि बनाइएको सार्वजनिक आश्रयस्थल नभई अत्यन्त धनाढ्य ग्राहकलाई लक्षित गरिएको निजी सुरक्षा संरचना हो। ग्राहकहरूले लामो अवधिका लागि—करिब ९९ वर्षसम्मका लिज—भूमिगत सुरक्षित स्थान प्राप्त गर्न सक्ने अवधारणा अघि सारिएको छ।