भारतका विदेशमन्त्रीको पाकिस्तानमाथि कडा प्रतिक्रिया, ‘आतंकवादलाई सामान्य बनाउन खोजे स्वीकार्य हुँदैन’

काठमाण्डौ । संयुक्त राष्ट्र महासभामा पाकिस्तानका प्रधानमन्त्री शहबाज शरीफले दिएको अभिव्यक्तिप्रति भारतले कडा प्रतिक्रिया जनाएको छ। भारतीय विदेशमन्त्री एस जयशंकरले पाकिस्तानको नाम नलिई आतंकवादको विषयलाई लिएर कडा टिप्पणी गरेका हुन्।

जयशंकरले निरन्तर आतंकवाद फैलाउने देशले त्यसलाई सामान्य विषयका रूपमा प्रस्तुत गर्दै त्यसका परिणामबाट उम्कन खोजे त्यो स्वीकार्य नहुने बताएका छन्।

यसअघि पाकिस्तानी प्रधानमन्त्री शरीफले संयुक्त राष्ट्र महासभालाई सम्बोधन गर्दै दक्षिण एसियालाई सन् २०२५ मा देखिएको जस्तो द्वन्द्वबाट पुनः जोगाउन कश्मीर मुद्दाको ‘न्यायपूर्ण र निष्पक्ष समाधान’ आवश्यक रहेको बताएका थिए।

शरीफले भारतले सिन्धु जल सन्धि स्थगित राख्नुको कानुनी आधार नरहेको दाबी गरेका थिए। उनले भारतले पाकिस्तानको हिस्सामा पर्ने सिन्धु नदीको पानी रोक्ने, अवरोध गर्ने वा मोड्ने प्रयास गरे त्यसलाई ‘युद्धको कार्य’ का रूपमा लिइने चेतावनीसमेत दिएका थिए।

त्यसको जवाफमा जयशंकरले महासभामा अघिल्लो दिन आतंकवादलाई निरन्तरता दिने एक देशले तथ्यलाई गलत ढंगले प्रस्तुत गरेको बताएका छन्। यद्यपि उनले आफ्नो सम्बोधनमा पाकिस्तान वा प्रधानमन्त्री शरीफको नाम भने लिएनन्।

जयशंकरले आतंकवादविरुद्ध आत्मरक्षा गर्ने अधिकार भारतसँग रहेको र आवश्यक परे त्यसको प्रयोग गर्ने बताए। उनले आतंकवादसँग मित्रता र सद्भावना सँगसँगै अघि बढ्न नसक्ने धारणा पनि व्यक्त गरे।

उनका अनुसार आतंकवादलाई निरन्तरता दिने पक्षसँग गरिने कुनै पनि समझदारी वा सम्बन्धबारे प्रश्न उठ्नु स्वाभाविक हुन्छ। उनले आतंकवादमा संलग्न पक्षले आफ्नो कार्यशैली परिवर्तन गर्नुपर्ने बताए।

जयशंकरले विश्व नेताहरूलाई सम्बोधन गर्दै आतंकवाद विश्व शान्तिका लागि निरन्तर चुनौतीका रूपमा रहेको बताए। कुनै देशबाट आतंकवादलाई समर्थन प्राप्त हुने र त्यसको उद्देश्य सीमापारसम्म फैलिने अवस्था विश्वव्यवस्थाका लागि चुनौती भएको उनको भनाइ थियो।

भारतले आतंकवादलाई समर्थन गर्ने सरकारलाई जवाफदेही बनाउनुपर्नेमा जोड दिएको छ। जयशंकरले आतंकवादविरुद्ध भारतको ‘शून्य सहनशीलता’ नीतिमा कुनै ढिलाइ नहुने बताउँदै विशेषगरी आतंकवादका वित्तीय स्रोत पहिचान गरी रोक्नुपर्नेमा जोड दिए।

यसैबीच, शरीफले संयुक्त राष्ट्र महासभामा आफ्नो सम्बोधनका क्रममा सन् २०२५ मा भारतसँग भएको द्वन्द्वका बेला ‘समयमै हस्तक्षेप’ गरेको भन्दै अमेरिकी राष्ट्रपति डोनाल्ड ट्रम्पलाई श्रेय दिएका थिए।