आम्दानी बढ्दा र खर्च कम हुँदा घलेम्दी हाईड्रोको नाफा धनात्मक

काठमाण्डौ । आम्दानी बढ्दा र खर्च कम हुँदा घलेम्दी हाईड्रो हाईड्रोपावरको नाफा धनात्मक हुन पुगेको छ । कम्पनीले सार्वजनिक गरेको चालु आवको पहिलो त्रैमाससम्मको अपरिष्कृत वित्तीय विवरणअनुसार कम्पनीले समीक्षा अवधिसम्म ७४ लाख ७४ हजार रुपैयाँ खुद नाफा आर्जन गरेको छ ।  

अघिल्लो आवको सोही अवधिसम्म भने कम्पनी ३ करोड १३ लाख रुपैयाँ घाटामा थियो । कम्पनीले यो अवधिमा विद्य्ुत बिक्री आम्दानी पनि बढाएको छ । अघिल्लो आवको पहिलो त्रैमाससम्म विद्य्ुत बिक्रीमार्फत २ करोड ३ लाख रुपैयाँ आर्जन गरेको कम्पनीले चालु आवको पहिलो त्रैमाससम्म भने ४ करोड ६६ हजार रुपैयाँ आर्जन गरेको छ । यो रकम अघिल्लो आवको तुलनामा ९६.६१ प्रतिशतले धेरै हो ।  

त्यस्तै कम्पनीले १ करोड १५ लाख रुपैयाँबराबरको अन्य आम्दानी पनि गरेको छ । कम्पनीले समीक्षा अवधिमा कर्मचारीका लागि ३६ लाख १३ हजार रुपैयाँबराबर खर्च गरेको छ । जुन रकम अघिल्लो आवको तुलनामा १६.३२ प्रतिशतले कम हो । कम्पनीले प्रशासनिक तथा साधारण खर्च समेत ५६.८३ प्रतिशतले घटाउँदै २६ लाख ४० हजार रुपैयामा झारेको छ । अघिल्लो आवको पहिलो त्रैमाससम्म २ करोड ८७ लाख रुपैयाँ रहेको कम्पनीको वित्त खर्च समेत घटेर २ करोड ४ लाख रुपैयाँमा सीमित बनेको छ ।  

कम्पनीको कुल खर्च भने १४.१० प्रतिशतले घट्दै ४ करोड ४१ लाख रुपैयाँमा सीमित बनेको छ । १९ करोड ९४ लाख रुपैयाँले रिजर्भ ऋणात्मक भएको कम्पनीले सेक्युरिटी प्रिमियम शीर्षकमा १८ करोड १५ लाख रुपैयाँ छ्ट्टाएको छ ।  

कम्पनीले यो अवधिसम्म ७० करोड ५६ लाख रुपैयाँ दीर्घकालिन कर्जा र १७ करोड २७ लाख रुपैयाँबराबरको अल्पकालिन कर्जा लिएको छ ।  

समीक्षा अवधिसम्म कम्पनीको प्रतिसेयर आम्दानी(ईपीएस)०.४५ रुपैयाँ, प्रतिसेयर नेटवर्थ ९८.९१ रुपैयाँ, प्रतिसेयर कुल सम्पत्तिको मूल्य १५२.६५ रुपैयाँ, मूल्य आम्दानी अनुपात ५०७.७५ गुणा र तरलता अनुपात १५.९४ प्रतिशत कायम भएको छ ।