धमाधम बन्द हुँदै इन्स्टाग्राम अकाउन्ट, मेटाको एआई सिस्टमका कारण कयौँ अकाउन्ट जोखिममा

काठमाण्डौ । यदि तपाईको इन्टाग्राम अकाउन्ट बिना कुनै अलर्ट बन्द भएको छ भने यस्तो हुने तपाई एक्लो भने होइन । यतिबेला विश्भरबाट प्रयोगकर्ताहरुले बिना कुनै गल्ति आफ्नो इन्स्टाग्राम अकाउन्ट मेटाले सस्पेन्ड वा ब्लक गरेको गुनासो गरिरहेका छन् ।

उनीहरुले अकाउन्ट बन्द हुनुअघि कुनैपनि प्रकारको अलर्ट वा चेतावनी प्राप्त नगरेको समेत बताएका छन् । वास्तवमा मेटाले यतिबेला फेसबुक तथा इन्स्टाग्राममा फेक अकाउन्ट,स्प्याम तथा बोट्सका विरुद्ध ठूलो अभियान चलाईरहेको छ । 

यसका लागि कम्पनीले आफ्नो एआई सिस्टक प्रयोग गरिरहेको छ । यो सिस्टमले संदिग्ध गतिविधि गरिरहेका अकाउन्टहरुलाई पहिचान गर्ने गर्छ । जस्तै धेरै म्यासेज पठाउने, एउटै प्रकारको कमेन्ट गर्ने र वा थर्ड पार्टी अटोमेशन टुल्स प्रयोग गर्ने । अटोमेशनको अर्थ मानिसको साटो कुनै मेशिनबाट एउटै काम बारम्बार गर्नु हो ।

यसमा समस्या भनेको एआईले कयौँपटक गल्ति समेत गरिरहेको छ । त्यसैले सामान्य रुपमा सञ्चालन भईरहेका अकाउन्ट पनि बन्द भईरहेका छन् ।

कम समयमा धेरै मानिसहरुलाई फलो र अनफलो गर्नेहरु पनि यो सिस्टमको निशाना बनिरहेको विज्ञहरुले दाबी गरेका छन् ।

मेटा पूर्ण रुपमा अटोमेशनका विरुद्ध भने छैन । कम्पनीले डेभलपर्स तथा बिजनेश प्रयोगकर्ताका लागि मेटा ग्राफ एपीआई नामको आधिकारिक सिस्टम उपलब्ध गराउँदै आएको छ । यसमार्फत केहि गतिविधिहरुलाई सुरक्षित तथा नियमको दायरामा रहेर अटोमेट गर्न सकिन्छ ।

मेटाको एपीआई सिस्टमको सबैभन्दा ठूलो विशेषता के हो भने, यसमा प्रयोगकर्ताले आफ्नो इन्स्टाग्रामपासवर्ड कुनै बाहिरको सर्भिसका साथ सेयर गर्नु पर्दैन ।

साथै, सबै गतिविध मेटाका तर्फबाट निर्धारित सीमा तथा नियम अनुसार सञ्चालित हुन्छ । बजारमा विद्यमान कयौँ ठूला प्लेटफर्महरुले समेत यहि आधिकारिक एपीआई प्रयोग गरिरहेका छन् । यस्तो प्लेटफर्मको प्रयोगलाई आम रुपमा सुरक्षित मानिन्छ ।