प्रधानमन्त्री बालेन र परराष्ट्रमन्त्री खनाल छुट्टाछुट्टै अमेरिका जाने, महासभालाई २४ सेप्टेम्बरमा सम्बोधन

NEWS
मंगलवार, भाद्र २३,२०८३ 15:14:24

काठमाण्डौ । प्रधानमन्त्री बालेन शाह र परराष्ट्रमन्त्री शिशिर खनाल संयुक्त राष्ट्रसंघको महासभामा सहभागी हुन छुट्टाछुट्टै अमेरिका जाने भएका छन्।

परराष्ट्र मन्त्रालयका अनुसार परराष्ट्रमन्त्री खनाल सेप्टेम्बर २१ मा न्यूयोर्क पुग्नेछन्। सेप्टेम्बर २२ देखि उच्चस्तरीय सम्मेलन तथा बैठकहरू सुरु हुने भएकाले उनी एक दिनअघि नै अमेरिका पुग्ने कार्यक्रम तय गरिएको हो।

प्रधानमन्त्री शाह भने सेप्टेम्बर २३ मा न्यूयोर्क पुग्नेछन्। उनले सेप्टेम्बर २४ मा संयुक्त राष्ट्रसंघको महासभालाई सम्बोधन गर्ने कार्यक्रम छ। सम्बोधनलगत्तै सेप्टेम्बर २५ मा उनी काठमाडौं फर्कनेछन्।

परराष्ट्रमन्त्री खनाल भने महासभासँगै अन्य उच्चस्तरीय बैठकहरूमा समेत सहभागी हुनेछन्। उनी सेप्टेम्बर २८ मा न्यूयोर्कबाट नेपालका लागि प्रस्थान गर्ने कार्यक्रम छ।

नेपालले सुरुमा परराष्ट्रमन्त्रीस्तरमै महासभामा सहभागी हुने तयारी गरेको थियो र मन्त्रिपरिषद्ले पनि सोहीअनुसार निर्णय गरेको थियो। तर भदौ १० गतेको भोटेकोशी बाढीपछि जलवायु न्यायको मुद्दा अन्तर्राष्ट्रिय मञ्चमा सशक्त रूपमा उठाउन प्रधानमन्त्री शाह स्वयं सहभागी हुनुपर्ने दबाब बढेपछि भ्रमण कार्यक्रम परिवर्तन गरिएको हो।

प्रधानमन्त्रीकै चाहनाअनुसार उनको भ्रमण छोटो बनाइएको बताइएको छ।

महासभामा सहभागी हुन नेपालबाट १५ सदस्यीय टोली अमेरिका जाने तय भएको परराष्ट्र मन्त्रालयले जनाएको छ। टोलीमा परराष्ट्र सचिव, प्रधानमन्त्रीका प्रमुख सल्लाहकार कुमार बेन, परराष्ट्र मन्त्रालयका अधिकारी तथा प्रधानमन्त्रीका निजी सुरक्षाकर्मी रहनेछन्।

परराष्ट्र मन्त्रालयका एक अधिकारीका अनुसार प्रधानमन्त्री शाहका साइडलाइन भेटवार्ताबारे भने अहिलेसम्म कुनै टुंगो लागेको छैन। त्यसैले हालसम्म कुनै द्विपक्षीय वा अन्य उच्चस्तरीय भेटघाट तय गरिएको छैन।