एनआरएन लक्षित सेयर निष्कासनको बाटो खुल्यो, प्रिमियम लिन नपाइने

काठमाण्डौ । गैरआवासीय नेपालीको पूँजी नेपालको सेयर बजारमार्फत परिचालन गर्न सरकारले नयाँ व्यवस्था ल्याएको छ । अब एनआरएन तथा गैरआवासीय नेपाली संघसँग सम्बन्धित लगानीकर्तालाई लक्षित गरी कम्पनीहरूले सेयर निष्कासन गर्न सक्नेछन् ।

सरकारले ‘धितोपत्र दर्ता तथा निष्कासन (आठौं संशोधन) नियमावली, २०८३’ जारी गर्दै यस्तो व्यवस्था गरेको हो । संशोधनले एनआरएन लक्षित सेयर निष्कासनसँगै त्यसको दोस्रो बजार कारोबारका लागि समेत छुट्टै आधार तयार गरेको छ ।

नयाँ व्यवस्थाअन्तर्गत कम्पनीले आफ्नो जारी पूँजीको कम्तीमा १० प्रतिशत र बढीमा ८५ प्रतिशतसम्म सेयर निष्कासन गर्न सक्नेछन् । यसबाट गैरआवासीय नेपाली लगानीकर्तालाई लक्षित गरेर प्राथमिक बजारबाट पूँजी जुटाउने बाटो खुलेको छ ।

यस्तो सेयर निष्कासन गर्दा कम्पनीले प्रिमियम भने लिन पाउने छैनन् । सेयर अंकित मूल्यमै जारी गर्नुपर्ने भएकाले अंकित मूल्यमा थप रकम जोडेर लगानीकर्ताबाट पूँजी संकलन गर्न रोक लगाइएको छ ।

एनआरएन लक्षित सेयरको दोस्रो बजार कारोबार पनि धितोपत्र बजारले तोकेको छुट्टै प्रणालीअनुसार हुनेछ । यस्तो कारोबारको न्यूनतम इकाई एक हजार कित्ता कायम गरिएको छ ।

नियमावली जारी भए पनि नयाँ व्यवस्था कार्यान्वयनमा आउने मिति नेपाल धितोपत्र बोर्डले तोक्नेछ । सरकारले धितोपत्रसम्बन्धी ऐन, २०६३ को दफा ११६ ले दिएको अधिकार प्रयोग गरी नियमावली संशोधन गरेको हो ।

यो व्यवस्थाले विदेशमा रहेका नेपालीको लगानीलाई कम्पनी तथा परियोजनाको पूँजी आवश्यकतासँग जोड्ने अवसर सिर्जना गरेको छ । एनआरएन लक्षित सेयर निष्कासन सुरु भएपछि घरेलु पूँजी बजारमा थप पूँजी परिचालन हुने अपेक्षा गरिएको छ ।